بزوتنەوەی گۆڕان بۆ یادی رۆژنامەگەری راگەیەنراوێكی بڵاوكردەوە
01:15 - 22/04/2026
زەمەن - هەواڵ
راگەیەنراوێک لە یادی ١٢٨ ساڵەی ڕۆژی ڕۆژنامەگەری کوردیدا
لە یادی ١٢٨ ساڵەی دەرچوونی یەکەم ژمارەی ڕۆژنامەی
"کوردستان، گەرمترین پیرۆزبایی ئاڕاستەی سەرجەم ڕۆژنامەنووسان و میدیاکارانی
کوردستان دەکەین. ئەم ڕۆژە وەرچەرخانێکی مێژوویی بوو کە تێیدا قەڵەمی کورد وەک چەکێکی
مەعریفی لە پێناو چەسپاندنی ناسنامەی نەتەوەیی و بڵاوکردنەوەی هۆشیاری سەری هەڵدا.
ئەمڕۆ لە کاتێکدا ئەم یادە دەکەینەوە، میدیای کوردی لەبەردەم
ئاڵنگارییەکی سەخت و هەستیاردایە. لە لایەکەوە، دەستوەردانی سیاسی و هەوڵی لایەنەکان
بۆ بەکارهێنانی میدیا وەک ئامرازێکی پڕوپاگەندە، زیانی گەورەی بە بێلایەنی و متمانەی
جەماوەر گەیاندووە. لە لایەکی دیکەوە، بەردەوامیی فشارە یاساییەکان، ڕێگریی لە دەستکەوتنی
زانیاری و دەستگیرکردنی ڕۆژنامەنووسان لە دەرەوەی چوارچێوەی یاسای ڕۆژنامەگەری، ژینگەیەکی
پڕ لە ترس و سانسۆری دروستکردووە.
هاوکات، تەوژمی سۆشیاڵ میدیا و بڵاوبوونەوەی هەواڵی ساختە،
ئەرکی ڕۆژنامەنووسی پیشەیی قورستر کردووە و بنەماکانی ئیتیکی کاری ڕاگەیاندنی
خستووەتە مەترسییەوە.
لەم یادەدا جەخت دەکەینەوە، کە تێپەڕاندنی ئەم قۆناغە تەنها
بە کاری پیشەییانە و هەستکردن بە بەرپرسیارێتی نیشتمانیی میدیا، جێبەجێکردنی یاسای
مافی دەستکەوتنی زانیاری و پابەندبوونی ڕۆژنامەنووسان بە ڕاستگۆیی و بەرپرسیارێتیی
نەتەوەیی دەکرێت. پێویستە میدیا ببێتەوە بەو دەسەڵاتە چاودێرەی کە پارێزەری مافە
گشتییەکانە، نەک پاشکۆیەکی گوێڕایەڵ و ئەجێندای
حیزبی.
سڵاو بۆ گیانی پاکی شەهیدانی قەڵەم و هەموو ئەو دەنگە
ئازایانەی لە پێناو ڕاستیدا دەجەنگن.
ژوری ڕۆژنامەوانی بزوتنەوەی گۆڕان
گردی زەرگەتە
٢٢ی٤ی٢٠٢٦