رێگای مەرگ، گۆڕا بە رێگای ئاسودەیی
02:56 - 24/02/2026
زەمەن - هەواڵ
رێگەی کۆنی گۆمەسپان بەهۆی تەسکيیەکەیەوە كە تەنیا ٦ مەتر بوو و هەروەها
بوونی زۆری پێچی مەترسیدار، ساڵانە دەبووە هۆی رووداوی دڵتەزێن و گرفتی زۆری بۆ شۆفێران
دروست دەکرد. بەڵام ئەمڕۆ رێگەكە
لە رێگای مەرگەوە گۆڕا بۆ رێگای ئاسودەیی.
ئەمڕۆ سێشەممە، ٢٤ی
شوباتی ٢٠٢٦، بە ئامادەبونی مەسرور بارزانی، سەرۆکی حکوومەتی هەرێمی کوردستان، و
دانا عەبدولكەریم وەزیری ئاوەدانكردنەوەو نیشتەجێكردن، و لایەنە پەیوەندیدارەكانی
دیكە، پڕۆژەی ستراتیژیی دووسایدی (هەولێر – گۆمەسپان) كرایەوە.
وەزیری
ئاوەدانكردنەوە بە میدیاكانی راگەیاند كە ئەم پڕۆژەیە بە یەکێک لە گرنگترین پڕۆژەکان دادەنرێت
و بە کواڵێتییەکی بەرز و لە ماوەیەکی پێوانەییدا بە ستانداردێکی نێودەوڵەتی دروست
کراوە و پایتەختی هەرێم بە پارێزگای سلێمانی، ئیدارەی راپەڕین و ناوچەکانی دیکەوە
دەبەستێتەوە."
دانا عەبدولکەریم
وتیشی، حكومەت و وەزارەتی ئاوەدانكردنەوە کار دەکات بۆ ئەوەی لە ماوەی سێ ساڵی
داهاتوودا سەرجەم رێگا سەرەکییەکانی نێوان پارێزگاکانی هەرێمی کوردستان بکرێنە
دووساید.
دانا عەبدولکەریم
تیشکی خستە سەر پلانی وەزارەتەکەی بۆ داهاتوو و رایگەیاند: "وەک وەزارەت
پلانمان هەیە لە ماوەی سێ ساڵی داهاتوودا هەموو رێگا سەرەکییەکانی نێوان پارێزگاکان
بکرێنە دووساید. لە ئێستاشدا کارکردن لە رێگاکانی (دووکان - چوارقوڕنە و هەولێر -
کۆیە) بە شێوەیەکی زۆر باش بەردەوامە."
سەبارەت بە پڕۆژەکانی
دیکە، وەزیری ئاوەدانکردنەوە ئەوەی خستەروو، رێگای کۆیە - دووکان دیزاینەکەی تەواو
بووە و لە قۆناغی ئامادەکاریدایە بۆ ئەوەی ڕادەستی بەڵێندەر بکرێت. هەروەها بۆ بەستنەوەی
هەولێر بە چوارقوڕنە، دوو بژاردە لەبەردەستن؛ یەکیان لە رێگەی تونێلی هەیبەت سوڵتان
و ئەوی دیکەیان لە رێگەی گۆمەسپان بۆ سماقوڵی و هەڵەبجە و پێنجوێن: رێگای سەیدسادق
- هەڵەبجە تەواو بووە و لە داهاتوویەکی نزیکدا کارکردن لە دووسایدی سەیدسادق - پێنجوێن
دەست پێ دەکات.
وەزارەتی
ئاوەدانكردنەوە و وەزیرەكەی، جیاواز لە هەشت كابینەكانی رابردوو، زۆرترین
خزمەتگوزاری رێگاوبانی پێشكەش بە لادێ و ناحیەو قەزاو رێگای دوو سایدی نێوان
شارەكان كردووە.