بافڵ تاڵەبانی: ئەو بەڵێنانەی بە خەڵکمان داوە دەبێت رەنگبداتەوە لە حکومەتی داهاتوودا
09:01 - 14/10/2025
زەمەن
پرێس
بافڵ تاڵەبانی، سەرۆکی یەکێتیی نیشتمانیی کوردستان لە بارەگای مەکتەبی
سیاسی لە هەولێر پێشوازی لە پاتریک دۆرێڵ، باڵیۆزی فەرەنسا لە عیراق کرد.
بەپێی ڕاگەیەندراوی کۆبوونەوەکە،سەرۆکی یەکێتیی نیشتمانیی کوردستان
رایگەیاند، یەکێتی هەر لە سەرەتاوە لەگەڵ پێکهێنانی حکومەتێکی بەهێز و خزمەتگوزار
و دادپەروەر بووە کە بتوانێت لە ئاست داواکاری و خواستی هەموواندا بێت و ببێتە
مایەی سەقامگیریی زیاتر نەک لێکترازان.
وتیشی: بۆ گەیشتن بەم ئامانجەش هەموو هەوڵێکمان داوە و ناشمانەوێت لە دەرەوەی
ئەم بەها باڵایانە هەنگاوێک بنێین کە دواتر بە زیان بۆ گەلەکەمان بشکێتەوە، چونکە
بە دڵنیاییەوە ئەو بەڵێنانەی بە خەڵکە خۆشەویستەکەمان داوە دەبێت رەنگبداتەوە لە
حکومەتی داهاتوودا.
هەر لە کۆبوونەوەکەدا جەخت لە ئەنجامدانی هەڵبژاردنێکی پاک و بێگەرد
لە عیراق کرایەوە و سەرۆک بافڵ وتی، خەمی ئێمە لە بەغداد خەمی خەڵکی کوردستانە،
بۆیە بەهێزی یەکێتی لە بەغداد بەهێزی پێگەی کورد و پاراستنی مافە رەواکانی گەلەکەمانە.