وەزارەتی ئاوەدانکردنەوە ٨٠٪ی پڕۆژەی رێگای ستراتیژی (قەڵادزێ-دارەشمانە)ی تەواو کرد
11:54 - 08/09/2025
زەمەن -هەواڵ
کارکردن لە پڕۆژەی نۆژەنکردنەوەو قیرتاوکردنی رێگای قەڵادزێ-دارەشمانە لە ئیدارەی سەربەخۆی راپەڕین قۆناغی گرنگی بڕیوەو لە کۆتایی نزیک دەبێتەوە.
پڕۆژەکە لە رۆژی ٢٠٢٤/٤/٢٥ لەلایەن دانا عەبدولکەریم، وەزیری ئاوەدانکردنەوەو نیشتەجێکردن بەردی بناغەی دانراوە، پێکهاتوە لە نۆژەنکردنەوەو قیرتاوکردنی رێگاکە بە درێژی (١٠.٣)کم، گوژمەی پڕۆژەکە دوای گۆڕانکاری سێ ملیار و (٧٦) ملیۆن دینارەو لەئێستادا زیاتر لە ٨٠٪ی کارەکانی تەواو بوە.
پڕۆژەی رێگای (قەڵادزێ-دارەشمانە) یەکێکە لەپڕۆژە ستراتیژییەکانی وەزارەتی ئاوەدانکردنەوەو نیشتەجێکردن و جگەلەوەی رێگایەکی سەرەکی هاتوچۆی هاوڵاتیانە، هاوکات رێگایەکی بازرگانیەو دەروازەی سنوریی کێلێ بەقەڵادزێ دەبەستێتەوە، لەڕوی کشتوکاڵ و گەشتیاریشەوە سودێکی گەورەی بۆ ناوچەکە دەبێت.