مافی مرۆڤ لەسەر دادگاییەکەى ئەمرۆ شاسوار عەبدولواحید هاتە دەنگ
11:11 - 28/08/2025
زەمەنپرێس:
ده‌سته‌ی سه‌ربه‌خۆی مافی مرۆڤ له هه‌رێمی كوردستان نیگەرانی خۆی
دەردەبڕێت بەرامبەر هێرشكردنە سەر ئه‌و كه‌سانه‌ی كە له كاتی
دادگاییكردنی شاسوار عه‌بدولواحید، سەرۆكی جوڵانەوەی نەوەێ ئامادەی دادگا بوون و
دەشڵێت، داوا دەکەین بەڵگەکانمان پێشکەش بکرێن و دەستە بەئەرکی خۆی دەزانێ
بەدواداچون بۆ ئەو توندوتیژیانە بكات.
دەستەی سەربەخۆی مافی مرۆڤ لە هەرێمی كوردستان، ئەمشەو لە
راگەیەندراوێكدا وتی، ئەمڕۆ پێنجەشەممە تیمێکی نوسینگەی سلێمانی دەستەكەیان
بەشداریان لەدانیشتی دوەمی دادگاییکردنی شاسوار عەبدولواحید، سەرۆکی جوڵانەوەی
نەوەی نوێ لەدادگای تێهەڵچونەوەی ناوچەی سلێمانی لەدادگای کەتنی/4، كردوە.
ئاماژەی بەوەشداوە، ناوبراو بەپێی ماددەی (431) لەیاسای سزادانی
عێراقی تۆمەتبارکراوە کە لەلایەن ئەندامێکی پێشوی پەرلەمانی کوردستان بەناوی (ش.
ن.) سکاڵای لەسەر تۆمار کراوە.
دەستەكە وتوشیەتی، دانیشتنی دادگاییەکە لە دادگای کەتنی (4)ی سلێمانی
بەڕێوەچو و ماوەی دو کاتژمێرو نیوی خایاند، بە ئامادەبونی سەرۆکی دادگاو ئەندامانی
دادگا و ئەندامی داواکاری گشتی و پارێزەرەکانی هەردولا و ژمارەیەک پەرلەمانتار و
کەسوکاری تۆمەتبار.
ئەوەشی خستۆتەڕوو، وتەکانی (6) شاهید لە دۆسیەکە وەرگیران کە
سەرجەمیان تۆمەتەکانی سەر تۆمەتبارکراویان ڕەتکردەوە و پاشان لائیحەی یاسایی
بەرگری پارێزەرەکان پێشکەشی دەستەی دادگا کراو، بەهۆی یەکلایی نەبونەوەی دۆسیەکەو
نەگەیشتن بەبڕیاری حوکمی کۆتایی دانیشتنەکە دواخرا بۆ ڕیکەوتی 2/9/2025.
دەستەی سەربەخۆی مافی مرۆڤ هێمای بۆ ئەوەش كردوە، سەبارەت بەڕودانی
پێشێلکاری بەگوێرەی وتەی ئەندامانی پەرلەمانی نەوەی نوێ کە چەند کەسێک بەجلی
مەدەنییەوە هێرشیان کردۆتە سەر ئەو خەڵکەی لەوێ ئامادەبونەو توندوتیژی بەکارهاتوە،
ئێمە وەکو دەستەی سەربەخۆی مافی مرۆڤ ڕایدەگەیەنین، نیگەرانین لەو کردارەو دژی
هەمو جۆرە پێشێلکارییەکین و بەهەمو شێوەیەک توندوتیژی ڕەت دەکەینەوە.
جەختیشی كردۆتەوە "ناکرێ لەناو حەرەمی دادگا ڕێگە بەو جۆرە
کارانە بدرێ و هیوادارین لایەنی پەیوەندیدار لێکۆڵینەوە لەو بابەتە بکات و لای
خۆشمانەوە چاودێری دەکەین."
دەستەكە دەشڵێت"ئێمە لەڕاگەیاندنەکان بینیمان باس لەهەندێ حاڵەتی
توندوتیژی دەکرێ بەرامبەر ئەو کەسانەی بۆ دادبینی لەوێ ئامادەبونە بۆیە
بەدڵنیاییەوە بەدواداچون دەکەین و داواش دەکەین بەڵگەکانمان پێشکەش بکرێن و دەستە
بەئەرکی خۆی دەزانێ بەدواداچون دەکات."