"بەپەلە نان مەخۆ، چونکە ٥ مەترسی تەندروستی هەیە":

04:14 - 15/04/2023 349 جار خوێندراوەتەوە

زەمەن _ تەندروستی 

دکتۆر _ داهات حەوێزی

 

 

زۆر لە توێژینەوە زانستیەکان باسی مەترسیە تەندروستیەکانی "بەپەلە نان خواردن"یان کردوە، توێژەرەوەکان جەخت لەسەر ئەوە ئەکەنەوە کە پێویستە نان بەهێواشی بخورێ و پاروو جوان بجورێ و هەر نان خواردنێک بەلایەنی کەمیەوە ۲۰ دەقەی پێ بچێ.

مەترسیەکانی بەپەلە نان خواردن بریتین لە:

 

-نەخۆشی شەکرە:

  بەپێی ڕاپۆرتێکی "مێدیکال دەیلی"ی بەریتانی بەپەلە نان خواردن مەترسی تووشبون بە شەکرە زیاددەکات چونکە خواردن بەخێرایی هەستی تێر نەبوون بە کەسەکە ئەبەخشێ و بەمەش کەسەکە خواردنی زیاتر ئەخوات و هاوسەنگی ئاستی گلوکۆزی خوێن و ڕێژەی ئەنسولین تێک ئەچێ و دەبێتە هۆی شەکرە.

-نەخۆشیەکانی دڵ:

  لە توێژینەوە زانستیەکانی زانکۆی هێرۆشیمای یابانی ئەوە دەرکەوتووە کە بەپەلە خواردن مەترسی تووشبوون بە نەخۆشیەکان دڵ و جەڵتەی مێشک زیاددەکات،هەروەها خواردن بەخێرایی مەترسی بەرزەفشاری خوێن و چەوری خوێن زیاددەکات.

-قەڵەوی:

  خواردن بەخێرایی واتە خواردنی بڕێکی زۆر، چونکە گەیشتنی پەیامی تێربوون بە مێشک ۲۰ دەقەی پێویستە بۆیە هەتا خێراتر نان بخۆی مەترسی قەڵەوی زیاتر ئەبێت.

-ترشەڵۆکی گەدە:

  خواردن بەپەلە و قوتدانی پارووی نەجوراو دەبێتە هۆی دڵەکزێ و ئازاری گەدە و هەرس نەکردن و قەبزی و سک باکردن.

-ژەهراوی بوونی خواردن:

  کاتێک بەپەلە نان ئەخۆیت بەتایبەتی لەفە و خواردنی فاست فوود زۆر هەست بە تامی خواردنەکە ناکەیت واتە ئەگەر خواردنەکەش تێکچوبێت زۆر هەستی پێناکەی و دوورنیە تووشی ژەهراوی بوونی خواردن بیت.

-لەکاتی بەربانگ کردنەوە بە دەنکێک خورما یان قومێک ئاو، دوای تۆزێک  قاپێک شۆربا یان سووپ بخۆ، دوای کەمێکی تر زەڵاتە بخۆ ئنجا چێشت بخۆ، دوای نیو سەعات چا بخۆرەوە، دوای ۲ سەعات میوە بخۆ، واتە پەلە مەکە و ووردە ووردە نان بخۆ و هەموو شتەکان بەسەریەکەوە مەخۆ!