کوردستان

ناوەندی هاوكاریی حیزبەكانی كوردستانی ئێران: فریای خەڵكی كوردستان بكەون

05:53 - 26/11/2022 102 جار خوێندراوەتەوە

زەمەن_رۆژهەڵاتى کوردستان

لە ڕاگەیەنراوێکدا ناوەندی هاوكاریی حیزبەكانی كوردستانی ئێران داوا دەکات بە فریای خەڵكی كوردستان بكەون و دەڵێت، تا ئێستا ٤٤٥ كەس كوژراون كە ٦٣ كەسیان خوار تەمەن ١٨ ساڵ و ٤٣ كەسیشیان ژنن.  

دەقی ڕاگەیەنراوەکە:  


  
ناوەندی هاوكاریی حیزبەكانی كوردستانی ئێران: بە فریای خەڵكی كوردستان بكەون  
بەڕێز سكرتێری گشتیی نەتەوە یەكگرتووەكان!  
كۆڕ و كۆمەڵە جیهانییەكان!  
دەوڵەتان و ڕێكخراوەكانی مافی مرۆڤ!  
نزیك بە ٧٠ ڕۆژ بەسەر ناڕەزایەتییە جەماوەرییە بەربڵاوەكانی ئێراندا تێدەپەڕێ. چەخماغەی ئەم سەرهەڵدانە، ناڕەزایەتی ‌دەربڕین بە كوشتنی بێبەزەییانەی ژینا (مەهسا) ئەمینی لە تاران بە دەستی پۆلیسی كۆماری ئیسلامی بوو. ئەم ناڕەزایەتییانە لە شاری سەقزی كوردستانەوە بە دروشمی "ژن، ژیان؛ ئازادی" زۆر هێمنانە دەستی پێكرد و بۆ هەموو كوردستان و ناوچەكانی دیكەی ئێران پەلی هاویشت و لە دەرەوەی وڵاتیش سەرنج و پشتیوانی زۆری كۆڕو كۆمەڵە سیاسی و غەیرە سیاسییەكانی بۆلای خۆی ڕاكێشاوە. بەڵام وەڵامی كۆماری ئیسلامی بۆ ئەم دۆخە سەرەتا حاشاكردن لە كوشتنی ژینا بوو، و دواتریش بە سەركوتی دڕندانەی خۆپیشاندەران گیانی سەدان كەسی دیكەیان ئەستاند و خۆپێشاندانە ئارامەكانیان بەرەو توندوتیژی و كوشتن و گرتن ڕاكێشا.  
ڕاپۆرتی ڕێكخراوەكانی مافی مرۆڤی باس لەوە دەكەن كەم، لە ئاستی ئێراندا هەتا ئێستا ٤٤٥ كەس كوژراون كە ٦٣ كەس لەوان خوار تەمەن ١٨ ساڵ و ٤٣ كەس لەوان ژنن. هەر ئەو ئامارانە دەڵێن كە زۆرترین كوژراوەكان لە ناوچە هەمیشە پەراوێزخراوەكانی بەلوچستان و كوردستان بوون، بە جۆرێك كە لە كوردستان هەتا ئێستا شوناسی ١٠٨ كوژراو زاندراوە كە ١١ كەس لەوان منداڵ و ٥ كەس لەوان ژنن و لەو ئامارەش لانیكەم ٦ كەس لەژێر ئەشكەنجەدا گیانیان لێ ئەستێندراوە.  
كۆماری ئیسلامیی ئێران جگە لە تاوانی بەكارهێنانی چەكی شەڕ دژ بە خۆپیشاندەران لە زۆربەی ناوچەكانی ئێران، كوردستانی زیاتر لە هەر شوێنێك میلیتاریزە كردوە و دڕندانە خەڵك دەكوژێت، تەنانەت لە بەشێك لە شارەكانی وەك جوانڕۆ رژیم لە چەكی دۆشكا و گازی فرمێسكڕێژی ژەهراوی كەڵكی وەرگرتووە. لە كوردستان بە گشتی خەڵك بەشێوەیەكی سیستماتیك كۆمەڵكوژ كراون و لە كەرەستەی شەڕی نێوان وڵاتان بۆ بەرەوڕووبوونەوە لەگەڵ خەڵكی مەدەنی و دەسبەتاڵی كوردستان كەڵك وەرگیراوە و ئەوەش بەتەواو مانا تاوان دژی مرۆڤایەتییە و كۆمەڵگەی جیهانی لەسەرشانیەتی پێش بە بەردەوامیی ئەو جینایەتانە بگرێت.  
دەزگای سەركوتی كۆماری ئیسلامی لەو ماوەیەدا بە بەردەوامی و بەتایبەت لەو چەند ڕۆژەی دواییدا، سەرەڕای ڕاگەیاندنی حكوومەت نیزامیی شەوانە لە زۆربەی شارەكانی كوردستاندا، بە شێوازی هەڕەمەكی و هۆڤیانە لە كۆڵانەوە تەقە لە ماڵی خەڵك دەكەن، و دواتر هەڵدەكوتنە سەر ماڵەكانیان، پیر و لاو، ژن و منداڵ دەدەنە بەر پەلامار و بە بیانووی بەشداری لە خۆپێشاندانەكاندا خەڵك لە ماڵەكانیان دێننە دەر و بە بێ‌ڕێزی و سووكایەتی و لێدان دەسبەسەریان دەكەن. جگە لەوەش لە زۆر شار و شوێن بۆ نموونە لە شارەكانی وەك بۆكان، جوانڕۆ و مەهاباد هێزە چەكدارەكانی سەر بە سپای پاسداران لە هەڵكوتانە سەر ماڵەكاندا لەگەڵ گەیاندنی خەسار و زیان، زێڕوزیو و كەلوپەلی گرانبایی ماڵەكانیش بەتاڵان دەبەن.  
ناوەندی هاوكاریی حیزبەكانی كوردستانی ئێران ڕادەگەیەنێ ئەوەی لە كوردستان رژیم دەرحەق بە خەڵك دەیكا جینایەتی جەنگی و تاوان دژی مرۆڤایەتییە. بۆیە پێشگرتن بە كۆماری ئیسلامی لە بەردەوامیی جینایەتەكانیدا پێویستیی بە ڕێكار و هەنگاوی بەكردەوەی جیدتر و لێبڕاوانەترە. دیارە پەسندكردنی بڕیارنامەی شوڕای مافی مرۆڤی نەتەوە یەكگروەكان دژی كۆماری ئیسلامی و دانانی كۆمیتەیەك بۆ دۆزینەوەی ڕاستییەكان كارێكی بەجێ و شیاو بوو، بەڵام ئێمە پێمان وایە دەبێ ڕێكاری جددیتر بۆ لێپرسینەوە و وڵامدەربوونی ئەو ڕێژیمە بگیرێتە بەر.  
ناوەندی هاوكاری حیزبەكانی كوردستانی ئێران جارێكی دیكە سەرنجی كۆمەڵگەی جیهانی بۆ دۆخی كوردستان و جینایەتەكانی رژیم ڕادەكێشێ و داوا لە ناوەندەكانی بڕیاردەر دەكا بەفریای خەڵكی كوردستانەوە بێن.  
ناوەندی هاوكاریی حیزبەكانی كوردستانی ئێران  
٥ی سەرماوەزی ١٤٠١ - ٢٦/١١/٢٠٢٢  

سۆشیال میدیا

ڕۆژنامەی زەمەن