کوردستان

ده‌ستگیرا به‌سه‌ر 5 هه‌زار سكه‌ و 7 هه‌یكه‌لی شوێنه‌واری

08:35 - 25/05/2020 560 جار خوێندراوەتەوە

"زه‌مه‌ن"


به‌ڕێوه‌به‌ری مۆزه‌خانه‌ی سلێمانی رایده‌گه‌یه‌نێت، ئاسایشی شارەزوور، دوو تۆمەتباریان دەستگیرکردووە کە نزیکەی پێنج هەزار سکە و حه‌وت هه‌یكه‌لی شوێنه‌وارییان پێبووه‌.


هاشم حه‌مه‌ عه‌بدوڵا، به‌ڕێوه‌به‌ری مۆزه‌خانه‌ی سلێمانی له‌ لێدوانێكی رۆژنامه‌وانیدا رایگه‌یاند، ئه‌مڕۆ بەڕێوەبەرایەتیی ئاسایشی شارەزوور، دوو تۆمەتباریان دەستگیرکردووە، کە چوار هەزار و 786 سکە و حەوت هەیکەلی شوێنەوارییان لە سلێمانییەوە بردووەتە هەڵەبجە، بەمەبەستی بردنیان بۆ ئێران و ساخکردنەوەیان له‌و وڵاته‌دا.

وتیشی، بەپێی ماددەی 63 لە یاسای شوێنەواری عێراق ئه‌و دوو كه‌سه‌ دەستگیرکراون و دانیان بە تاوانەکەدا ناوەو ره‌وانه‌ی دادگا ده‌كرێن، به‌مه‌به‌ستی دادگاییكردنیان.

ئاماژه‌ی به‌وه‌شكرد، پێویسته‌ لێكۆڵینه‌وه‌ له‌ دروستی و ساخته‌یی ئه‌و پارچه‌ شوێنه‌وارانه‌ بكرێت، به‌ڵام گومان ده‌كرێت زۆرینه‌یان ساخته‌ بێت.

ئه‌وه‌شی خسته‌ڕوو، به‌پێی یاسا، دوای دادگایی كردنی ئه‌و دوو كه‌سه‌، ئه‌و پارچه‌ شوێنه‌وارانه‌ی پێیان گیراوه‌ راده‌ستی مۆزه‌خانه‌ی سلێمانی ده‌كرێت.

 

سۆشیال میدیا

ڕۆژنامەی زەمەن

Advertisement