241وتار

ئێستاش دژم..

4/17/2023 5:27:00 PM

دڵشاد مه‌لا

من دەوڵەتێكم ناوێت ژێردەستەی داگیركەران بێت، دەنگی ئازا و ڕۆژنامەنوسانی تێدا تیرۆر بكرێت، ڕیشی مەلای تێدا بسوتێنرێت و شەق لە مامۆستاكانی هەڵبدرێت، ئەسڵەن دەوڵەتێكم ناوێت سەر و برۆی پێشمەرگە و پارێزەری تێدا بتاشرێت! بەڵێ دەوڵەتێكم ناوێت گەنجی خێرلەخۆنەدیوی گیرفان بەتاڵ لە خۆپیشاندانەكاندا خەڵتانی خوێن بكرێت، بۆیە تا سەر ئێسقان دژی ئەو دەوڵەتە دەبم كە دەسەڵاتدارەكانی چاوساخی درۆنەكانی داگیركەران بێت و كون بە كونی نیشتیمان بەدوای براكانی خۆیەوە بێت! ئێمەمانان خوێنمان بۆ ئەم نیشتیمانە داوە ئێمە دەزانین كێ دەوڵەتمەدارە و كێش جاش و گوێ لە مستی داگیركەرانە، بۆیە سوور بزانم سبەی ئەمانە دەوڵەتی كوردی دروست دەكەن من دژی دەبم.
ئێمە بۆ دژ بووین؟
ئێمەومانان بۆ دژی ڕیفراندۆمچییەكان وەستاینەوه و خەڵك چۆن لە ئێمەیان دەڕوانی، چۆن باوەڕیان بە ئەوان هێنابوو؟ ئێمە حەقیقەتە تاڵەكەمان دەبینی و خەڵكیش لەژێر كاریگەری سۆزوعاتیفەی كوردایەتی و نواندن و وتارە چەواشەكارانەكەی سەرۆكدا ئێمەیان بە جاش و ئەوانیشیان بە نیشتیمانپەروەرێكی عەیاره24 لە قەڵەم دەدا، كەلەحقیقەدا ئەوەی ئەوان عەیارە 0 بوو ئەوەی ئێمە عەیارە 24ە حەقیقەتەكە بوو، بە هاتوهاوار و قیڕەقیڕ وایان لە خەڵك گەیاندبوو كە لە دوای دەنگدان دەوڵەتی كوردی لەپێش دەرگایە!!
شەوێك پێش ڕیفراندۆم
شەوی پێش ڕیفراندۆم خزمێكم زۆر بە جدی بە دڵسۆزییەوە بۆنیشتیمان لێم هاتە پێش و پێی وتم چەندت پارە دەوێت دەتدەمێ بەس دەنگ بە ڕیفراندۆم بدە، كه ئەو خزمەم نە پارتی بوو نە یەكێتی بەڵكو تەنها لە دڵسۆزییدا بۆ نیشتیمان ئەو پێشنیارەی بۆ كردم و منیش پێموت بە قوربانتبم بۆ تۆ وا تیگەیشتووی كە خاكفرۆش و خیانەتكارێك دەوڵەتی كوردیت بۆ دروست دەكات؟ نا ئەزیزم ئەمەش پیلانێكی تری داگیركەرانە كە چەند ڕۆژێك پێش ڕیفراندۆم لە نووسینێكدا هاوارم كرد كە ئەگەر بێتو یەكێتیی بچێتە ئەم یارییەوە ئەوا ناوچە دابڕاوەكان دەكەونە ژێر مەترسییەوە، دەرئەنجام بەداخەوە ناوچە دابڕاوەكانمان لەدەستدا، جا هەر ئەو خزمەمم بە هاشوهوشی میدیاكانی پارتی تێنەكوتبوو بەڵكو زۆرینەی حزبەكان و كۆلكە سیاسییەكانی بۆنی درۆی ڕیفراندۆم وای سەرخۆش كردبوون ڕاست و چەپیان لە یەك جیا نەدەكردەوە.