646وتار

سی و سێ ساڵ پێش ئێستا سواری ئیڤایان کردین لە ئەنفالدا

4/8/2021 5:52:00 PM

دڵشاد مه‌لا

*١٩٨٨/٤/٨ ئەو ڕۆژە شومەی کۆی ژیانی گۆڕیم
ئەمڕۆ ۳۳ ساڵ بەسەر ئەو ڕوداوەدا تێ دەپەڕێت
بەئێستاشەوە چاوی چاوەڕوانیم دانەخستوە.

دوای کیمیاباران کردنی هەڵەبجە ڕژێمی بەعسی فاشست لەڕێگەی بەکرێگیراوەکانیەوە بەهەموو دێهاتەکاندا بڵاوکردەوە ئەگەر دێهاتەکان چۆڵ نەکەن و دانەبزنە خوارەوە هاوشێوەی هەڵبجە کیمیا باران دەکرێن.

ئێمە لە گوندی حەمەیقادری گەرمیان بوین ئەوکات باوکم و زۆرینەی پێشمەرگەکانی گەرمیان لە شەڕەکانی سەرکردایەتی یەکێتی بون ئێمە بێ سەرپەرشتی بوین. لەگەڵ ئەنجومەنی دێ مەحموی حاجی ڕێکەوتین لەگەڵمان بێت دابزینە سەر جادەی قیر ماڵی ئێمەو ماڵی کاک حسن و کاک برایمی حەمە علی ماڵی سەردارە سور و ماڵی دکتۆر هەمزە ئەوایش وەک ئێمە تەنها ژن و مناڵەکانیان لەگوند مابونەوە پیاوەکان هەمویان لەشەڕەکانی سەرکردایەتی بون تەنها مەحموی حاجی وەک پیاو لەگەڵمانا بوو خۆی و دوو کچی عازەبی. بڕیارێکی قورس بوو کە بەڕۆژی ڕوناک دابەزین بەڵام ناچاری بوو لە ترسی کیمیایی ئەو بڕیارە درا کاتژمێر ۱۲ و نیوی نیوەڕۆ بەپێ بەڕێکەوتین لە گوندی ژاڵە دەچوین کۆپتەرێکی ڕژێم بەسەرمانا سوڕایەوە بەڵام تەقەی لێ نەکردین نزیکی کاتژمێر ۳ی عەسر لە گوندی ڕەنگەلی خان کە گوندێکی سەر جادەی قیری نێوان کەلار باوەنورە کەوتینە بۆسەی دوو سەربازی عێراقیەوە لە نزیک گوندەکە دوو سەربازە کە یەکێکیان درێژێکی ڕەشی ناشرینی دان درێژ بوو ئەو تریشیان دەموچاو سپیەک بوو زۆر لێیان پاڕانەوە ژنەکان یەکێک لەوانە دایکم بوو دایکم تۆزێک عەرەبی دەزانی چون پێشئەوە باوکم بچێت بۆ پێشمەرگایەتی لە بەغداد نیشتەجێ بوین قەت ئەو چرکە ساتەم بیرناچێت دایکم بە سەربازە داندرێژەکەی وت، خاتر اللە لەوڵامدا وتی اللە موجاز بەواتای (خودا لە مۆڵەتە). قەنەعەتیان بە سەربازە سپیکەلەنەکە کرد کەبڕۆین بەڵام ئەو دان درێژە ناشرینە ڕازی نەبوو ئێتر چەند سەربازێکی تر لە ڕەبیەی گوندی عیسایی یەوەوە هاتنە خوارەوە لەگەڵ دوانەکەی تر بردینیان بۆ سەرجادەکە هەموو خەڵکی گوندی ڕەنگەلی خان سەیریان دەکردین بەڵام لاحەولەولاقووە بوون کەچونە سەر جادە چەند پیکابێکیان بۆ گرتین دایکم یەکسەر چووە پێشی پیکابەکەوەو سایەقەکەی ناسی جانتایەکی بچوکی دایە دەستی و پیوت تکایە ئەمە بە ئامانەتەوە تەسلیمی باوکمی بکە ئەویش مەردانە وتی بەسەرچاو ئەو جانتا بچوکە هەموی ئەوراقی باوکم بوو ئەگەر ئەو جانتایە دەست ڕژێم بکەوتایە خەڵکێکی زۆر لە سێدارە دەدرا لەبەر ئەوەی باوکم مەسئولی باجی گەرمیان بوو ناوی هەموو ئەوکەسانەی کە پارەیان دابوو بەشۆڕش لەو جانتایەدا بوو خۆشبەختانە ئەو جانتایە دەست ڕژێم نەکەوت.

دواتر بە پیکابەکە تا گوندی عیسایی بردینیان لەوێ وەستاین تا ئیڤاکان گەیشتن لەوێ سواری ئیڤایان کردین بۆ لیواکەی کەلار دایکم لەناو ئیڤاکەدا پێی وتین ئەگەر لێیان پرسین باوکتان لە کوێیە و ناوی چیە و ئیشی چیە ئێوە بڵێن باوکمان ناوی محمدە و شوانە دوای ئەوەی لە لیوای کەلار تەحقیق تەواو بوو سواری پاسیان کردین بردینیان بۆ خێوتگەیەکی سەربازی هەر لە ناو کەلار لە نزیک کەلاری کۆن کە ئێمە گەیشتین چەند خێزانێکی تر ڕۆژێک پێش ئێمە ۷ی٤ گیرابون ئەو کات من تەمەنم ۱۰ ساڵ بوو ئۆردوگای سمودی ئەوکات و ڕزگاری ئێستا تازە دروست دەکرا.

ئەفسەرەکە پێی وتین مەترسن ئەتانبەین لەوێ نیشتەجێتان دەکەین دوای ٤ ڕۆژ لەو خێوتگەیە مواجەهە کرایەوە پورە فەوزیەم و مەهاباتی ئامۆزام و باپیرم هاتن بۆ سەردانمان لەوکاتەیا کۆچەری برام کە ئەوکات تەمەنی ٥ ساڵ بوو کردبووی بەژێر عاباکەیەوە و ڕزگاری کرد مەهاباتی ئامۆزاشم ئارازی برامی گرتە باوەشی کە تەمەنی ٦ مانگ بوو بۆ ئەوەی ڕزگاری کا دواتر ئەفسەرەکە زانی مەهابات تەمەنی مناڵە و ئەو مناڵە هی ئەو نیە گوتی نابێت ئەو مناڵە بەرن تکایان لێکرد کە نەخۆشەو بۆ چاسەر دەیبەن دەیهێننەوە وتی بەمەرجێک ئەو پیرەمێردە بە اللە سوێندم بۆ بخوات ڕازی دەبم باپیرم زۆر لە خوا ترس بوو سوێندەکەی نەخوارد ئەویش ڕازی نەبوو ئارازی گەڕاندەوە بۆ دایکم شەوەکەی بەدایکمم وت مادام کۆچەر ڕۆیشتوە سبەی منیش ڕادەکەم وتی تۆ ناتوانی گەورەی بۆ بەیانیەکەی لای عەسر بە ئەفسەرەکەم وت ئەها ئەو مناڵانە ئەیانەوێت ڕابکەن ئەو مناڵانە من ئاماژەم بۆکردن زۆر مناڵبون هەر نەشیان دەزانی ڕاکردن چیە بۆیە وام بە ئەفسەرەکە وت ئەو بڕواو پشتم تێ بکات و ڕێگاکەم بۆ چۆڵ بکات خۆشبەختانە بەقسەی کردم و ڕێگاکەی بۆ چۆڵ کردم ئەوەی بەلامەوە تا ئێستاش جێی گومانە من بەکوردی قسەم کرد ئەو ئەفسەرە چۆن لێم تێگەیشت بۆیە گومان دەکەم کورد بوبێت.
بەهەر حاڵ لەگەڵ ڕۆیشتنی ئەفسەرەکە من توانیم ڕابکەم
بەداخەوە ڕۆژێک دوای ڕاکردنم دایک و براکانم هەموو ئەوانەی ناو خێوەتگەکە ڕەوانەی ئەمنی سلێمانی کران و لەوێشەوە بۆ نورەسەلمان چیرۆکێکی تاڵ و ناخۆشە بۆیە درێژەی نادەمێ.