بۆ فەرەیدون عەبدولقادر
11/22/2022 8:13:00 PM
دلێر عەبدولخالق
ئەوەی کاک نەوشیروان ئەندامی دەستەی دامەزرێنەری
یەکێتی نیشتیمانی کوردستان نەبوە؛ چەوتییەکە(هەڵەیەکە بە پلەی چەواشەکاری) و بە عەمدەن
خراوەتە بازاڕەوە، یاخود بەشێکە لە پرۆسەی داگیرکردنی مێژو و بە قازانجی فیگەرە یەکەمەکانی
یەک بنەماڵەی سیاسیی و لێدان لە کارەکتەرە گرنگەکانی دیکە بەڕێوەدەچێت.
بۆ سەلماندنی ڕاستی ئەم بۆچونە بە دو بەڵگە؛ دەدوێم:
یەک/ خوالێخۆشبو مام جەلال لە ساڵی (٢٠١٢) و لە
پەیامی دامەزراندنی یەکێتی دا، کە ئێستاش لە سەکۆی یوتیوب بەردەستە، دەڵێت:
# یەکەم کەس کە پێی وتراوە
بۆ دامەزراندنی یەکێتی کاکە نەوە بوە.
# یەکەم کەس لە دەستەی
دامەزرێنەر ئامادەبوە بگەڕێتەوە و کوردستان و واز لە خوێندنی دکتۆرا بێنێ و، جۆش و
خرۆش بداتە خەباتی چەکداری کاکە نەوە بوە.
# یەکەم کەس داوای لە من
کردوە بگەڕێمەوە بۆ کوردستان کاکە نەوە بوە.
دو/ خۆت لە یاداشتەکانت لە کتێبی هەڵۆ سورەکانی
قەندیل، لاپەڕە ٣٦١، دەنوسیت «نەوشیروان مستەفا یەکێک بوە لە بەشدارە دیارەکانی
دامەزراندنی ی.ن.ک»
ماوەتەوە بڵێم، کاک نەوشیروان وەک چرایەک لەماڵەکانمان
داگیرساوە و لاپەڕەکانی مێژو بە ئاوی ئاڵتون ناوی ئەویان لە خەباتی ڕزگاری نیشتیمانی
و خەباتی مەدەنی نەخشاندوە، هەربۆیە لەبری چەواشەکردنی خۆت، دەوروبەر و مێژو؛ ئاوڕێک
لە ماڵەکەی خۆت بدەرەوە کە لە شوشەیە، چونکە خەڵکی کوردستان خاوەندارێتی لە کاک نەوشیروان
دەکا، لە کەس قبوڵ ناکەن، بۆ مەسڵەحەتی ڕۆژ و شتی دنیایی، ڕەمزەکانی خەوشدار بکا.