359وتار

دڵتێکهەڵهاتن و قۆزتنەوەی کاتی زێڕین و تاوانی دو لۆ

2/18/2022 7:35:00 PM

بابان بریزی

تەوقیتی قەراری محکەمەی ئیتیحادی، تەوقیتێکی زەهەبییە.

-عەرەب ،بۆ کوتانی سەرانی کوردایەتی دۆڕاو، باشترین تەوقیتیان بۆ بڕیاردانی دادگای فیدراڵی دیاریکرد، تەوقیتێ کە ڕوس و چین لە ترۆقە و پشتیوانییاندایە و میللەتی کورد لە کوردایەتیکاران لە ئەوجی بێزاریدایە و ینك و پدکیش لە دوای ڕیفراندۆم و تاپۆڕەشەکەی گیرفانیان لە سەر پۆستی سەرکۆماریی عێراق لە قۆناغی مریشکە ڕەشەدان ، [وانێك وتەنی].

- کاتێ سەرانی کوردایەتی ئیفتیخاریان بە عێراقیبونیانەوە کردبێ و لە سەر سەرکۆمارییەکەشی شەڕیان بوبێ و کوردستانیان کردبێ بە نشینگەی بێترس بۆ ملیۆن و نیوێك عەرەب ،خۆ هەر ئابڕوچون و بێجاییە بە سوپا و دادگای عێراقی جێئیفتیخاریان و گەلی عەرەبی هاو سویتی شوقەیان و هاو بەرەی پەڕلەمانییان، بڵێن داگیرکەر.

- بەپێی ماددەی (١١٢)ی دەستوری عێراق، تەنیا مافی هەرێم و پارێزگا بەرهەمهێنەرەکانی نەوت دیاریکراوە، نەکو مافی نابەرپرسانی بانپرسی پرۆکسیی تورکی و هەڵپەکارانی دراوی دزێتی و کۆکەرەوەی سامان؛ لە سەر ئەژمێری ڕەشوڕوتی میللەت.
دەوڵەتی عێراق و داو و دەزگا فیدڕاڵییەکانی و ئاغاکانی سەرانی کوردایەتی خۆشیان و هەمو جیهانیش دەزانن کە نەوتی هەرێم لە پێناوی بەرژەوەندیی هەرێمدا دەرنەهێنراوە و دەشزانن کە گەلی هەرێمی کوردستان دژبەری دەسڵاتدارانی کوردایەتین، بۆیە ئێستا قانون و گەلانی عێراقیش پێکەوە هەمویان دژی سەرانی نەوتدز و تاڵانکاری کوردایەتین.

- ئەی ، عەرەب بۆیە بیست و یەك قەوارەی هەیە، کە تەنها سێ دانەشیان لە زەوینی کۆنی عەرەبدایە و کوردیش بۆیە چاخ دوای چاخ زەوینی دێرینی دێتەوە یەك و دەچێته ئاو ، وەکو قوماشی کودەری، چونکە عەرەب ڕامیار و هەلقۆزەوەیە و کاتی زێڕین هەڵدەبژێرێ بۆ هێنانەدی ئامانجەکانی، هەر بۆیە توانیویانە سود لە وەرگرتنی ئیسلامی قوڕەیشی، لە هەڵوەشانەوەی دەوڵەتی عوسمانی، لە دامەزراندنی دەوڵەتی نەتەوە تەنانەت توانیویانە سود لە دروستبونی داعش و حەشدیش ببینن ، لە داعش دا ،وەکو غازییەکی خونخوار و لە حەشدیش دا ، وەکو ئاوارەیەکی دیمۆگرافیگۆڕ ، ئەوان هەمو پێشهاتەکان ، وەکو دەرفەت دەبینن بۆ ڕەگداکوتین و دروستکردنی نشینگە و نیشتیمان، بە پێچەوانەشەوە کورد لە هەمو دەرفەتە زێڕینەکاندا بە دوای پارە و هەڵپەی گیرفان و وردە شوناسی خێڵەکی و خۆکەسییەوەیە، هەر بۆیە بە دەستی بەتاڵ وهەگبەی خاڵییەوە لە هەمو نەواڵەکانی دیرۆکدا هاتووەتە دەرەوە، هەمو جارێ دوای دەیان ساڵ خەبات و تێکۆشان و دوای ڕوبارێ خوێن و دۆڵێك برین، مایەپوچ و نائومێد بووە، هۆکار یش لە خودی تاکی کوردەوەیە، کە تاکگەلێکی ساویلکەی یەکنەگرتوی خۆشباوەڕە، ئەمەش گوازراوەتەوە ناو کەسێتیی سەرکردە و بنکردەشی، هەر بۆیە دەبینین کورد هیچ گۆڕانێکی کات و شوێن ناقۆزێتەوە و هەمو دەرفەتەکانی لەدەستدەچێ و نیشتیمانەکەشی تا دێ تەسکتر دەبێتەوە ، بە پێچەوانەشەوە عەرەب ئاوارەییش دەکاتە هۆکاری دروستکردنی نشینگە و نیشتیمانی نوێ و گۆڕینی دیمۆگرافیا و تەعریبێکی سپی و لە سەرخۆ.

-هەتا لە کورد بنۆڕیت و لێیورد بیتەوە ، دڵت تێکهەڵیەت و بێزار دەبیت، هەربۆیە ڕێبەر ئۆجەلان وتویەتی :
"کوردبون تاڵە و هەڵهاتن لێی نامەردییە"

- مادە و پاتە و دەستور و مەستور ناخوا، زلهێزان ململانێیانە لە سەر جیۆپەلەتیك و وزە، کاتی پێویستیش بۆ چاکسازی درا بە سەرانی کوردایەتیی شەمالی حەبیب، ئەوان نە گوێیان لە دڵسۆزان گرتو نە ڕێوشوێنە پێشنیازکراوەکانی پشتیوانانیشیان بە هەند وەرگرت، هەر بۆیە هەر دەبێت ئەم تڕەکەڵەکەی ئەم وەستا ناشییانە هەڵیانچنیوە بڕوخێ، دوبارە دوای چەند دەیەیەکیتر بە ڕەنجی پۆلێ دڵسۆزیتر بە مۆدێلێکی خەباتیتر هەوڵ بۆپچڕینی مافە ئابوری و کلتوری و زمانییەکانمان بدرێت، ناڵێم مافی سیاسی، چونکە دەزانم مافی سیاسی لە سەروەختی دەرکەوتنی دێوە چینییەکە و هەستانەوەی ورچە جەمسەرییەکەدا، ئیتر بەو شێوەیە ناسەنرێ کە پێشتر دەسەنرا، چونکە باوی دەوڵەتی نەتەوە نەماوە و بلۆکبەندیی نوێش ڕێی دروستبونی ئەو جۆرە دەوڵەتە بە کورد ناداتەوە، هەروەها مۆدێلی فیدراڵێتیش لەم بلۆکبەندییە ڕوسی و چینییەدا جێی نابێتەوە، هەڵبەت دەکرا پێش لە دەستدەرچونی دەرفەت، سەرانی کوردایەتیی باشور بەگوێی ئەمریکایان کردبا و لەگەڵ ڕۆژاوای کوردستاندا پەیوەندییان خورتکردبا و دور بکەوتنایەتەوە لەتورکیا، بەڵام بەرژەوەندییە دەستەیی و خۆکەسییەکان ئەو هیوایەشیان لە چاڵنا.

-تاوانی دو لۆ

میللەت لە ڕقی حزبیەلی ناو گێژاوی کوردایەتی، حەزدەکەن دەسڵاتی هەرێم کلکوگوێبکرێ، نازانن هەر خودی میللەت لە ئەگەری بچوککردنەوەی قەوارەی هەرێمدا زیانۆمەندن، چونکە سەرانی ناو گێژاوی کوردایەتی، ماڵ و سامان و داهاتویان لە وڵاتەکانی خۆیان بونیاد ناوە و ئێرە شوێنکاریان بووە، سی ساڵە لێرە سامان پێکەوە دەنێن و هەناردەی دەرەوەی دەکەن، هەڵیشیانبفڕێنن لە دارستانێکی خۆشتردا دەنیشنەوە، تەنیا ئێمەین دیسان قوڕمان بۆ دەگیرێتەوە، ئەو دۆخەی کە داهاتو دەیهێنێتە پێش، چەندە ئەنجامی تاوانی سەرانی ناو گێژاوی کوردایەتییە، هێندەش تاوانی ساویلکەیی میللەتی دوای ئەوانکەوتو بووە لە ماوەی ئەو سی ساڵەدا، کە نەیتوانیوە مۆدێلێکی جیاواز بخاتە ڕۆژەڤەوە و هەر لە گۆڤەندی کوردایەتیدا لۆقەلۆق گاوانیی گرتووە.

- هەر ئێمەی بێبەشکراوانی خوێنبەخش بە کوردستان ، خەمی مانەوەی قەوارەکەمانە، ئەوانەی سی ساڵە دەستوپێوەندی سەرانی کوردایەتین، لە ئەگەری زاڵبونەوەی عەرەبدا تەنیا ئێڵەمپییەکەیان سوڕ دەدەن و دیسان ئێمە دەبینەوە بە دژە ستەمی عەرەب و ئەوانیش دیسان دەبنەوە بە داردەستی ستەمکار.