وتار

دەنگی تۆ هاوارێکی بەهێزە بۆ ئازادی

9/23/2021 5:54:00 PM 151 جار خوێندراوەتەوە
داهێن هاشم



ئەگەر دەنگ نەدەیت، زیندانیەکانی بادینان ئازار ئەدەیت، ئەگەر دەنگ نەدەیت ژمارەی زیندانییەکان بەرەوژوور هەڵدەکشێ ، ئەگەر دەنگ نەدەیت هەناسەی ئازادیمان تەنگتردەبێ ، شیشی زیندانەکان پتەوتر و بێ باکی دەسەڵات زیاتر .

دەنگی تۆ دەنگی ئازادیە ، دەنگی تۆ هاوارێکی بەهێزە بۆ راچڵەکاندنی نەیارانی ئازادی ، شتێک لەم زەمینە و زەمەنەی کوردستاندا بتوانێ دەسەڵات ڕاچڵەکێنێ دەنگی تۆیە ، دەنگی تۆ پڕ بەهاترین زەبرە دژ بەستەم و بێدادیە.

سەرنج بدەن ،دامەزراوە میدیاییەکانی سایەیی نەوت و قوتی دزراوی تۆ ، چۆن ئاراستەی بینینمان ئەگۆڕن ، پروپاگەندەی گەورە ئەکەن بۆ ئەوەی خەڵک دەنگ نەدات ، ئاراستەیی نارەزایەتی بەرەو رووی ئەوهێزانە ئەگۆڕن کە بەشێکنین لە قەیرانی دروستکراو بەڵکو چارەسەرن ،میدیایی سیبەری پارەی نەوت و سامانی گشتی هەرگیز دەسەڵاتی زۆرینە وەک گرفتی بەردەم چاکسازی پیشان نادەن ، بەڵکو ئاراستەکە بەو جۆرە ئەگۆڕن کە ئەوانەی ئەیانەوێ چاکسازیبکرێت توانایان نیە.

دەنگ نەدانی تۆ سزای ستەمکاران نیە ، دەنگدانی  تۆ سزای ستەمکاریە ، دەنگ نەدانی تۆ پاداشتێکە بۆ ئەو دەسەڵاتەیی خوی بەستەمکردن و بێدادیەوە گرتوە ،دەنگی تۆ تەنها مافێکە کە خۆت ئەتوانی پیادەی بکەیت و هیچ کەسێک و هیچ ئیرادەیەک ناتوانێ لێت زەوتبکات ، ئەو تەنها مافەی تۆ کە ناتوانن لێت بسێنن ئەیانەوێت بیفەوتێنی ، ئەوان بە پارەی زۆر و پروپاگەندەی زۆر ئەیانەوێ ئەم ئیرادەیەشت کە تەنها هی خۆتە ممارەسەی نەکەیت.

ئیرادەی زۆرینەی  خەڵک بەدڵنیاییەوە بۆ گۆڕانکاری ئیرادەیەکی بەردەوام و جێگیرە ، نەهج و دیدی سیاسی و بنەماکانی بزوتنەوە گۆڕانیش وەک هەمیشە بەرێچکە دروستەکەی خۆیدا ئەروات ، ئەوەی گۆڕاوە ،زیاتر بونی هێزی ستەمە ، ئەوەی گۆڕاوە ژەهری پروپاگەندەیه دژ بەگۆڕانکاری ئەوەش بایکۆت و جێبەجێنەکردنی ئەم  ئەرکە بچوکەی دیموکراسی بۆ نەیارانی گۆڕانکاری رەخساندیان.
دەنگ نەدانی تۆ ستەم ، گەندەڵی، هەڕەشە و تیرۆر زیاتر دەکات ، دەنگی تۆ هەناسەی ئازادی و دادی کۆمەڵایەتی دێنێتە دی .
دەنگی تۆ هاوارێکە بۆ ئازادی .

سۆشیال میدیا

ڕۆژنامەی زەمەن

Advertisement