وتار

ئیدارە سەربەخۆکان...ناوی بێ ناوەرۆک

7/28/2021 10:25:00 PM 88 جار خوێندراوەتەوە
کاروان کازم


حکومەتی هەرێمی کوردستان لە نوێترین بڕیاریدا لە دانیشتنی رێککەوتی 28/7/2021 بڕیاریدا هەردوو قەزای( زاخۆو سۆران) بکاتە ئیدارەی سەربەخۆ هاوشێوەی هەردوو ئیدارەی گەرمیان و راپەرین کە پێشتر کرابوون.

بەسەربەخۆ ئیدارەدانی قەزاو ناوچەکانی هەرێم لەلایەن حکومەتی هەرێمەوە کۆمەڵێک تێبینی یاسایی ورد هەڵدەگرێت و لەڕووی نفوزی سیاسی و دابەشکاری کێرفی حزبیەوە جگە لە تۆخکردنەوەی قەڵەمڕەوی پارتی و یەکێتی شتێکی تر نیەو ناوی بێ ناوەرۆکە و بارێکی قورس و زیادەیە لە پشتی سیستمی لامەرکەزی دەنرێت و مەبەست و مەغزای تری لەپشتە.گرنگترین سەرنجە یاسایی و واقعیەکان بریتین لە:


یەکەم: دەستوری عێراقی هەمیشەیی ساڵی 2005 لە مادەی 116 بەدەق دیاریکردووە کە هەیکەلیەتی ئیداری سیستمی ئیتحادی لە کۆماری عێراق دابەش دەبێ بۆ  پایتەخت و هەرێمەکان و پارێزگا لامەرکەزییەکان و یەکە ئیدارە خۆجێیەکان.حکومەتی هەرێم لەسەر چ بنەمایەکی دەستوری و یاسایی بەرگ بۆ ناوهێنان و بونیادی ئیدارەی سەربەخۆ دەدۆزێتەوە؟؟.بۆیە ئیدارەی سەربەخۆ تەواو رەهەندی نادەستوری هەیە لەسەر ئاستی عێراق و بەم پێیەبێت حکومەتی بەغداد هەروەک چۆن هەتا ئێستا ئامادەنیە مامەڵە لەگەڵ بە پارێزگابوونی هەڵەبجە بکات کە بنەمای یاساییشی هەیە نەخاسمە مامەڵە لەگەڵ ئیدارەی سەربەخۆبکات؟!.


دووەم: ئیدارەی سەربەخۆ لەدەرەوەی میکانیزمی پێکهێنانی یەکەئیدارییەکانە لەناو یاسای ژمارە 3ی ساڵی 2009ی پارێزگاکانی هەرێم، چونکە یاسای ناوبراو یەکەی کارگێڕی حەسرکردووە بە(پارێزگا، قەزا، ناحیە).


سێیەم: لەرووی واقعیەوە پارێزگارو بەرپرسی یەکە کارگێڕییەکانی ئەو ناوچانەی دەکرێنە ئیدارەی سەربەخۆ لە پرسی تەمویل و پارەدرکردن و پێدانی دەسەڵاتەوە تووشی ئاریشە دەبنەوە، بەنموونە پرسی پترۆدۆلار و دیاریکردنی پشکی ئەو یەکە ئیدارییانە جگە لە بەش بەشێنەی حزبی پێوەری تری بۆ نامێنێتەوە لەسەر ئاستی سەروو خۆیان کە پێشتر هەیانبووە.


چوارەم: ئەزموونی رابردووی بە سەربەخۆکردنی ئیدارەکانی راپەرین و گەرمیان سەلماندویەتی ئەو بابەتە لەبەر خاتری سیستمی لامەرکەزی نەکراوەو دۆخی ئەو ناوچانەی بەرەو باشبوون نەبردووە لەڕووی خزمەتگوزارییەوەو دانیشتوانەکەی سوودمەندنەبوون و تەنانەت بە پارێزگابوونی قەزایەکی وەک هەڵەبجەش ناوی بێ ناوەرۆک بووە.

ڕوئیای بزوتنەوەی گۆڕان بەوجۆرەیە لەبری ڕاگەیاندنی سەربەخۆی ئیدارەکان دەسەڵاتی دارایی و کارگێڕی زیاتر بە یاسا بدرێتە پارێزگاو قەزاو ناحیەکان و بە دادپەوەری و دوور لە ستەمی جوگرافی لە ئەنجومەنی وەزیرانەوە مامەڵەیان لەگەڵ بکرێت.

▪️ئەندامی ژووری یاسایی بزوتنەوەی گۆڕان

سۆشیال میدیا

ڕۆژنامەی زەمەن

Advertisement