تێ ناگەم
5/28/2020 5:31:00 PM
د. شێرکۆ عەبدوڵا
*تێ ناگەم بۆچی جاران کاھوویان بە سرکەوە ئەخوارد.
*تێم گەیەنن یەعنی چی کورد نەوتی ئیسرائیلی پێ دابین ئەکرێ کەچی کارەبای قالاوای لێ بووە بە تەیارە.
*تێ ناگەم چۆن مێشوولە شەوان گیزەکەی ئەبێ بە ڤڕەی ھەلیکۆپتەر.
*کەس تێ ناگات حکومەتە قەرزارەکەمان ئەم چەند ساڵە نەوتی فرۆشتووە یان پۆکەری کردووە.
*تێ ناگەم موعارەزە بۆچی ناچێتە بەر ئاوێنە سەیرێکی حاڵی خۆی بکات.
*ئێستەش تێ نەگەیشتم ترساندنی مناڵ بە شەولەبان چ حیکمەتێکی پەروەرەدەیی تیابوو.
*تێ ناگەم بۆچی ئەبێ جوگرافیای کوردستان بخوێنین؟ ھەقە تفی تێ بکەین.
*تێ ناگەم کێ فەیسبووکەوانی کوردی فێر کردووە لە دووەم چاتدا بپرسێ بڵێ چیت لەبەردایە.
*تێ ناگەم توور موحتەرەمە یان بێ قیمەت؛ مەدحی شتێک بکەن زۆر سپی و خۆش بێ ئەفەرموون ئەڵێی توورە، زەمی شتێکی بێ نرخیش بکەن ئەلێن توورێک ناھێنێ.
*تێ ناگەم ئێمە ئەگەر ئەو پەڕلەمان و ئەنجومەن و شتانەمان نەبێ تووشی کەمیی چ ڤیتامینێک ئەبین.
*تێ ناگەم ئەگەر کوردستان جێگەی بەچکەشێران بێ ، ئەو ھەموو ڕێوییە چی ئەکەن لە بازاڕ و حیزبەکاندا.