وتار

گەندەڵیی وەك خوو، گەندەڵیی وەك كولتوور

1/14/2020 3:56:00 PM 86 جار خوێندراوەتەوە
د.یەحیا عومەر رێشاوی

پەرلەمانتار عەلی حەمەساڵح: “گرفتی گەورە لە گەندەڵیی و داهاتی نەوت و خاڵە سنوریەكانە!”.

ئەمە دوا لێدوانی هاوڕێی خۆشەویست (كاك عەلی حەمەساڵح)ە بۆ سایتی خەندان، بە ئیجازەی بەڕێزیان ئەمەوێت بڵێم: راستە هەموولا دان بەوەدا دەنێن، كە گەندەڵیی تا بینەقاقای حوكمڕانی هەرێم هاتووە، دروستە كە حكومەت هاتۆتە سەرخەت و بۆ سومعەی خۆیشی بێت دەیەوێت شتێ بە شتێ بكات، ئەوەش راستە كە پەرلەمان یاساو پرۆسەیەكی چاكسازیی لەبەردەستەو نیەتی هێناوە ئەمجارە لە جارانی تر نەچێت و بۆ لاساییكردنەوەی بەغداش بێت هەر ئەبێ وەڵامێكی بۆ ئەو خەڵكە پێ بێت، بەڵام ئەوەی ئەم راستیانە دەكاتە بڵقی سەرئاوو ئومێدەكانت لا دەكوژێنێتەوە، ئەو واقیعە تاڵەیە، كە بەرۆكی سیستمی حوكمڕانی و دام و دەزگاكان و بەشێكی زۆر لە بەرپرسانی ئەم هەرێمە خێر لە خۆنەدیوەی گرتووەو هەوڵەكان بۆ چاكسازیی‌و پاكسازیی دەهێنێتەوە چوارگۆشەی یەكەم!

ئەوەی كە ناچارت دەكات نیوە بەتاڵەكەی پەرداخەكە ببینیت و ببیتە بەشێك لە گروپی رەشبینەكان، ئەو هەواڵانەیە كە لێرەو لەوێ لەسەر بەردەوامیی خووی قێزەونی واسیتەو واسیتەكاریی و بەرتیل وەرگرتن‌و مەحسوبیەت و بەحیزبیكردنی دام و دەزگاكانی میریی دەبیستیت و دەخوێنیتەوە، ئەوەی ناچارت دەكات بەم زمانە بنووسیت و ئاخاوتن بكەیت، ئەو ژینگە نەخۆشەیە، كە بە ڤایرۆسی گەندەڵیی تەنراوەو چووەتە نێو شادەمارەكانی فەرمانگەو رێكخراو و حزب و زانكۆ و دام و دەزگاگان و  جەستەیەكی شەکەت و ماندووی بۆ بەجێ هێشتووین.

بەڵگەی زۆرت ناوێ بۆ سەلماندنی ئەم قسانە، لیژنەت ناوێ بۆ دۆزینەوەی بەرپرس و سەرانی ئەم واقیعە پڕ لە نیگەرانییە، هەر ئەوەی لە ئان و ساتی بڕیارەكانی پەرلەمان بۆ جێبەجێكردنی پرۆسەی چاكسازیی و هەر لەو ساتانەی سەرۆكی حكومەت بەڵێنی سزادانی گەندەڵكاران دەدات، هەر بە پاراڵێڵ بە بەڵێنەكان بۆ لێپرسینەوەو گۆڕانكاریی و دادگاییكردن، بە بەرچاوی خۆتەوە دەبینیت زەوی كاكی بەكاكی بۆ خزمان تەملیك دەكرێن‌و دۆستانی حزب دادەمەزرێنرێن و كوڕان و كچانی بەرپرسان لە كەیف و سەفای خۆیان ناكەون و ئاپۆرای ئۆتۆمبێلە جام رەشەكانیش شەقامەكان زیاتر دەتەنن و تەزكیەی حزبیی و تەلەفونی بەرپرسانیش هێشتا دەوای دەردی زۆرێك لە نەكراوو ئەستەمەكانە! ئیتر مەگەر هەر تەنها بڵێیت: حسبنا الله و نعم الوكیل !

هەربۆیە لە فەزایەكدا كە ئەوانەی دەیانەوێت پرۆسەی چاكسازی ئەنجام بدەن و سزای ئەوانی دی بدەن، خۆیان پێویستیان بە(سزادان) بێت، لە فەزایەكدا شوێنی حەوانەوەی هەندێك لە بەرپرسانی ئەم وڵاتە لایەك لە شار داگیر بكات و بە چەند دیوارێكی ئاسنین بە رووی هاوڵاتیاندا داخرابێت، لە فەزایەكدا كەس نەزانێت داهاتی ئەم وڵاتە بە چ میكانیزمێك و چۆن خەرج دەكرێت و دەزگای میدیایی زەبەلاح بە پارەوپولی سەرچاوە نادیار قوت بكرێنەوە، لە فەزایەكدا هێشتا بەڕێوەبەری خوێندنگەو سەرۆكی زانكۆو نوێنەری هێڵەكانی هاتوچۆی پاسەكانی ناوشار لەلایەن كۆمیتەو ناوچەو لق و مەڵبەندەوە ئاراستە بكرێن و هێشتا بارەگا حكومیەكان وەك بارەگای حزبی بەكاربهێنرێن و هێشتا وێنەی سەركردەكان بە پردەكانی پەڕینەوەو فەرمانگە حكومیەكان و بە قەبارەی پەنجا مەتریی هەڵبواسرێن و هێشتا لەنێوان كەمتر لە كیلۆمەترێكی رێگەی سماقوڵی بۆ هەولێر دوو بازگەی پشكنینی مڕومۆچ پێشوازیت لێ بكەن، چۆن دەتوانی ئومێدێكت هەبێ بەو شتەی ناویان لێناوە (پرۆسەی چاكسازیی؟!)

سۆشیال میدیا

ڕۆژنامەی زەمەن