حەمەی حەمەسەعید: یەکدەنگی نیشتمانی بووە گەورەترین بەربەستی بەردەم میدیای شۆڤێنی
05:04 - 25/01/2026
زەمەن - هەواڵ
وەزیری ڕۆشنبیری
و لاوانی هەرێم، پەیامێک ئاڕاستەی کەناڵەکانی ڕاگەیاندن دەکات، دەشڵێت، ‘ئەم یەکدەنگییە
نیشتمانییە لە ئاستی جیهاندا بووە گەورەترین بەربەست لە بەردەم میدیای شۆڤێنی و
پشتیوانانی تیرۆر”.
حەمەی حەمە سەعید،
وەزیری ڕۆشنبیری و لاوانی حکومەتی هەرێمی کوردستان لە پەیامێکدا ڕایگەیاند: بە ناوی
خۆمان و وەزارەتەکەیانەوە، سوپاس و پێزانین بۆ کۆدەنگی و هەماهەنگی کەناڵەکانی ڕاگەیاندن
(نووسراو، بینراو، بیستراو، ئەلیکترۆنی)، نووسەران، ڕۆشنبیران، هونەرمەندان، وەرزشوانان،
لاوان و چالاکانی تۆڕە کۆمەڵایەتییەکان دەردەبڕین لە پای بەتەنگەوە بوونی دۆزی
کورد لە ڕۆژئاوای کوردستان و گەیاندنی دەنگی گەلی کورد بە جیهان و ڕێگریکردن لە جینۆسایدێکی
دیکە دژ بە گەلی کورد.
دەشڵێت: یەکدەنگی
و بەتەنگەوەبوونی توێژە جیاجیاکانی کۆمەڵگەی کوردستانی و وەستانیان شانبەشانی خوشک
و برایانمان لە ڕۆژئاڤای کوردستان، نیشانەی دەرکەوتنی سەردەمێکی نوێی گیانی کوردایەتی
و خەمڵینی خەباتی نەتەوایەتییە لە پێناو ڕزگاری نیشتمانیدا.
باسی لەوەشکردووە:
ئەم یەکدەنگییە نیشتمانییە لە ئاستی جیهاندا بووە گەورەترین بەربەست لە بەردەم میدیای
شۆڤێنی و پشتیوانانی تیرۆر و ڕێگر بوو لەبەردەم ئەو ماکینانەی پڕوپاگەندە، کە دژی
کورد و بزووتنەوە نەتەوەییەکەی خرابوونەکار و هەوڵی شێواندنی ڕاستییەکان و دروستکردنی
زەمینەی جینۆسایدێکی دیکەیان دەدا.
وەزیری ڕۆشنبیری
و لاوانی هەرێم ئەوەشی ڕاگەیاندووە، وێڕای سوپاس و پێزانینی زۆرم بۆ شەونخوونی ڕۆژنامەنووسانی
کوردستان و هەموو ئەو چالاکانەی لە ڕێی تۆڕە کۆمەڵایەتییەکانەوە ڕووحیەتی کوردبوون
و دەنگی کوردستانیانیان بە جیهان گەیاند، داواکارم لە هەموو لایەک بەو گیانە نیشتمانی
و نەتەوەییە و لە چوارچێوەی پاراستنی کولتووری ئاشتەوایی و پێکەوەژیانی کۆمەڵگەی
کوردستان بەردەوام بن لە گەیاندنی ڕاستییەکان.