دادگای سلێمانی داوای سروە عەبدولواحید دەکات بێتە بەردەم دادگا
12:38 - 30/08/2025
زەمەن _ هەواڵەکان
دادگای تێهەڵچونەوەی سلێمانی نوسراوێکی فەرمی ئاراستەی په‌رله‌مانى عێراق کردوەو داوای ئامادەبونی سروە عەبدولواحید سەرۆکی فراکسیۆنی نەوەی نوێ دەکات لەدادگا.
ئەمڕۆ شەممە، ٣٠ی ئابی ٢٠٢٥، بەگوێرەی نوسراوێكى دادگای تێهەڵچونەوەی ناوچەی سلێمانی كە لەمانگی تەمموزی ئەمساڵ دەرچووە و ئاراستەی په‌رله‌مانى عێراق كراوە ئاماژەى بەكردنەوەی پەڕاوی لێكۆڵینەوە كردوه سەبارەت بەسروە عەبدولواحید پەرلەمانتاری جوڵانەوەی نەوەی نوێ بەتۆمەتی تۆمەتهەڵبەستن.
هاوکات، لەنوسراوەكەى دادگاى سلێمانیدا ئاماژە بەڕۆژی دادبینی كراوە كە پێویستە ناوبراو لە٢٣ی ١٢ی ٢٠٢٥، لەبەردەم دادگا ئامادە بێت بۆ وەرگرتنی وتەكانی.
ئەمە لە کاتێکدایە، ئەو مادە یاساییەی كە دۆسیەی لەدژی پەرلەمانتار سروە عەبدولواحیدی پێكراوەتەوە، مادە 433ی یاسای سزادانی عێراقیە كە باس لەتاوانی تۆمەتهەڵبەستن بەناڕەوا دەكات بەشێوەیەكی ئاشكرا بۆ ڕای گشتیی، بەبێ بونی بەڵگەیەكی ڕاست‌و دروست، ئه‌وه‌ش زیانی دەرونی‌و مەعنەوی بەكەسی تۆمەت بۆهەڵبەستراو دەگەیه‌نێت‌و سزاكەی گرتن‌و پێبژاردن یاخود یەكێك لەو دوو جۆرە سزایەیە.