پەیامی نوێی رێبەری زیندانیكراوی پەكەكەیان بۆ رای گشتی
11:26 - 29/08/2025
زه‌مه‌ن - هه‌رێمی كوردستان
شاندی دەم پارتی دوای گەڕانەوەیان لە ئیمراڵی
و کۆبوونەوەیان لەگەڵ عەبدولا ئۆجالان پەیامێکیان بڵاوکردەوە و تێیدا ئۆجالان دەڵێت”تێگەیشتن
و پێكەوە كاركردن بۆ ئەم جووڵە ستراتیژییە قازانجێكی زۆری بۆ هەموومان، بۆ هەموو
توركیا دەبێت”.
ئەمڕۆ هەیینی 29ـی ئابی 2025، شاندی دەم
پارتی كە دوینێ سەردانی عەبدوڵا ئۆجالانیان كرد، پەیامی نوێی رێبەری زیندانیكراوی
پەكەكەیان بۆ رای گشتی بڵاوكردەوە.
شاندەكەی دەم پارتی لە ڕاگەیەندراوێکدا
ئاماژە بەوەدەکات، تەندروستی عەبدوڵا ئۆجالان زۆر باش بووەو ورەیەكی بەرزی هەبووە،
و بە گەشبینییەوە لە پرۆسەی ئاشتی دەڕوانێت.
هاوکات شاندەکە چەند پەیامێکی نوێی ئۆجەلانیان
لەبارەی هەڵوێستی خۆی بەرامبەر پرۆسەی چارەسەری، بڵاوکردەوە، و ئۆجالان دەڵێت” كێشەكەی
ئێمە وەك برینێكی قووڵ بووە كە پێویستی بە نەشتەرگەرییەكی تایبەت هەیە.”
ئاماژەی بەوەشداوە “ئامانجمان ئەوە بوو
كە هەموو هەوڵێك بدەین بۆ كۆتاییهێنان بە پڕۆسەیەكی پڕ ئازار.”
ئۆجالان لە پەیامەکەیدا جەختی لەسەر هەڵبژاردەی
خۆی كردووەتەوە كە “هەمیشە یەكگرتنێك بووە لەسەر بنەمای كۆماری دیموكراسی و كۆمەڵگەی
دیموكراسی.
هاوکات شاندەکە بڵاویانکردەوە، عەبدوڵا
ئۆجالان هەمیشە بڕوای بە تێگەیشتن و پێكەوە كاركردن هەبووە، بەتایبەت بۆ ئەم جووڵە
ستراتیژییە، کە قازانجێكی زۆری بۆ هەموومان، بۆ هەموو توركیا دەبێت.
بەپێی پەیامەکە، عەبدوڵا ئۆجالان چەند
رەخنەیەک لە هەڵوێستی بەشێک لە سیاسییەکان دەگرێت و دەڵێت” هەندێك لە سیاسەتمەداران
و رۆژنامەنووسان مامەڵە لەگەڵ ئەم هەڵبژاردەیەدا بە شێوازێكی پشتگوێخستن دەکەن ئەمەش
زیان بە پڕۆسەكە دەگەیەنێت”.
لە كۆتایی شاندەكە باس لەوە دەكەن ئۆجالان،
“دووبارە جەختی لەسەر باوەڕی گەورەی بە دۆستایەتی هەمیشەیی و ئاشتیی نێوان گەلان
كردەوە.”