دابەشکردنى ئاو لە سلێمانی ئاسایی دەبێتەوە
08:10 - 12/08/2025
زەمەن پرێس:
بەختیار تاهیر، بەڕێوەبەری ئاوی سلێمانی ڕایگەیاندووە، کۆبونەوەی
قەوزە و پیسی لە شوێنی وەرگرتنی ئاوی خەزانی دوکان، بووە هۆی ئەوەی پڕۆژەکە تەنها
بە نیوەی توانای خۆی کار بکات، ئەمەش کاریگەریی راستەوخۆی لەسەر دابەشکردنی ئاو
بەسەر گەڕەکەکاندا هەبو.
باسی لەوەشکردووە، توانیمان لە ماوەی یەک ڕۆژدا ئەو بەربەستە پاک
بکەینەوە و دۆخی ئاوەکە بۆ ئاستی ئاسایی خۆی بگەڕێنینەوە، ئێستاش خشتەی دابەشکردنی
ئاو بۆ گەڕەکەکان وردە وردە ئاسایی دەبێتەوە و بەردەوام دەبین لەسەر باشترکردنی.
ئاشکراشی کردووە، ئەوەی رەنگدانەوەی زەقی لەسەر کەمبونەوەی ئاو
هەبووە، دابەزینی ئاستی ئاوی کانیاوی سەرچنار بووە، ئەگەر ئاستی ئاوەکە زیاتر
دابەزێت، لەوانەیە ناچاربین ماوەی پێدانی ئاو بە گەڕەکەکان کەمتر بکەینەوە.