هەسەدە: هێرشەکان پێچەوانەی رێککەوتنی نێوان ئەحمەد شەرع و مەزڵووم عەبدین
09:23 - 09/08/2025
زەمەن پرێس
هێزەکانی
سوریای دیموکرات (هەسەدە) لە راگەیەندراوێکدا بڵاویکردەوە، هێرشکردنە سەر چەند
ناوچەیەکی رۆژئاوای کوردستان پێچەوانەی رێککەوتنی نێوان ئەحمەد شـ.ـەرع و
مەزڵـ.ـوم عەبدین.
لە راگەیەندراوەکەی هێزەکانی سوریای دیموکرات هەسـەدە)
دا هاتووە، “لە کاتێکدا گەلی سوریاو هەموو لایەنە پابەندەکان بە چارەسەری ئاشتیانە
چاوەڕێی سەقامگیری لە سەرانسەری سوریا دەکەن، هێشتا ئەو گروپانەی سەر بە تورکیا كە
لە ژێر چەتری حکومەتی دیمەشقدا کاردەکەن بەردەوامن لە پێشێلکردنی ئاگربەست لە
ناوچەکانی دێرەزۆر، دێرحافر، بەنداوی تشرین و تەل تەمر و لە دەوروبەری گەڕەکی شێخ
مەقسود و ئەشرەفییە لە شاری حەلەب جموجۆڵی گوماناوی دەکەن، ئەمەش پێشێلکردنی
ئاشکرای ئەو رێککەوتنەیە کە لە 1ی نیسان لەنێوان ئیدارەی دوو گەڕەکەکە و ئیدارەی
دیمەشق ئیمزاکراوە.
هەر لە راگەیەندراوەکەدا هاتووە، ئەو گروپانە زیاتر
لە 22 جار هێرشیان کردووەتە سەر ناوچەکانی باکوور و رۆژهەڵاتی سوریا و چەکی
قورسیان بەکارهێناوە، ئەمە جگە لە هێرشی زەمینی و هەوڵدان بۆ پەڕینەوە لە رووباری
فورات بۆ هێرشکردنە سەر بنکەی هێزەکانمان لە دێرەزۆر کە بوونەتە هۆی برینداربوونی
زیاتر لە 11 هاوڵاتی مەدەنی و زیانێکی بەرچاو بە ناوچەکانی دانیشتووانی مەدەنی، کە
ئەمەش پێچەوانەی رۆحی ئەو رێکكەوتنەن کە لە نێوان ئەحمەد شەرع و مەزڵوم عەبدی
ئەنجامدراوە.
لە کۆتایی راگەیەندراوەکەی هەسەدەدا هاتووە، دەست
بۆ دیالۆگ و هاوکاری درێژ دەكەین بۆ سوریایەکی سەلامەت و سەقامگیر، بەڵام لە هەمان
کاتدا ئامادەین هەر رێوشوێنێک پێویست بێت بۆ بەرگریکردن لە ماف و ئاسایشی
گەلەکەمان بیگرینەبەر.