لەسەر کوشتنى سێ کەس پۆلیسی گەرمیان ١٢ کەس دەستگیر دەکات
09:56 - 13/07/2025
زەمەن پرێس:
دوای
ئەوەی مانگی رابردوو سێ کەس لە سنوری گەرمیان لەسەر کێشەی زەویوزار کوژران، لە
ئێستادا 12 تۆمەتبار دەستگیرکراون و فەرمانی دەستگیرکردن بۆ شەش کەسی دیکەش
دەرچووە.
عەلی
جەمال قەدوری وتەبێژی پۆلیسی گەرمیان رایگەیاند، دوای ئەوەی لەرۆژی 23 / 6 / 2025
تاوانێکی کوشتن لەگوندی سەیبێخانی سەربەناحییەی شێخ تەویل، لەنێوان دوو لایەن
بەهۆی کێشەی زەوی وزارەوە رویدا، لەئەنجامدا سێ کەس بەناوەکانی ( س.ج.م )
لەدایکبووی 2004 و ( م.ج.م ) لەدایکبووی 1999 لەلایەنی بەرانبەریش کەسێک بەناوی (
م.ع.م ) لەدایکبووی 1997 بەهۆی بەرکەوتنی فیشەکەوە گیانیان لەدەستدابوو.
وتیشی،
دوای گەشتنی پۆلیسی بەشی نەهێشتنی تاوانی گەرمیان بەشوێنی روداوەکە دوو لەتەرمەکان
رەوانەی پزیشکی دادی قەزای کەلار کران و یەکێکی تر لەتەرمەکان کەلە لایەنی
بەرنبەربوو رەوانەی پزیشکی دادی دەربەندیخان کرا.
وتەبێژی
پۆلیسی گەرمیان ئەوەشی خستەڕوو، دوای لێکۆڵینەوە سەرەتاییەکان و وەرگرتنی وتەی
چوار شاهید کەڕوداوەکە بەوجۆرە بووە، کە کەسێک دوو کەسی کوشتوە کەبرای یەکترن و
کەسێکی دیکەی بریندارکردوە دواجار خۆشی کوشتوە، بەڵام دوای لێکۆڵینەوەی وردی پۆلیس
و ئەنجامی راپۆرتی توێکاری پزیشکی دەربەندیخان دەرکەوت کە تاوان لێکراو پێنج
فیشەکی بەرکەوتوەو خۆی نەکوشتوە بەڵکو کوژراوە .
راشیگەیاند،
لەئێستادا 12 کەس لەهەردوو لایەن بەپێی مادەی 406 لەیاسای سزادانی عیراقی
دەستگیرکراون و فەرمانی دەستگیرکردن بۆ شەش تۆمەتباری تر بەهەمان مادە دەرچووە.