بارەگای بارزانی: لە بەغداوە بەڵێندراوە کێشەى مووچە چارەسەر بکرێت
09:03 - 12/07/2025
زەمەن پرێس:
بارەگای بارزانی ڕایدەگەیەنێت، لایەن و
کەسایەتییە سیاسییەکان و حكوومەتی عێڕاقی فیدراڵ بۆ چارەسەرکردنی ئەو کێشەیە
بەڵێنی ئەوەیان داوە کە لە چەند ڕۆژی داهاتوودا پرسی ناردنی مووچە و شاییستە
داراییەکانی هەرێمی كوردستان چارەسەر بکرێت.
لە ڕاگەیەندراوێکدا بارەگای بارزانى سەبارەت بە
کۆبوونەوەکەى مەکتەبی سیاسی پارتى و دواین هەڵوێستی بەغدا رایگەیاند: پەیوەست بە
کێشەکانی نێوان هەرێمی کوردستان و حکوومەتی عێراقی فیدڕاڵ، لەسەر یەکلاییکردنەوەی
پرسی مووچە و بودجە و شاییستە داراییەکانی هەرێمی کوردستان ئەمڕۆ مەکتەبی سیاسیی
پارتی بۆ وەرگرتنی هەڵوێستی پێویست کۆبوویەوە.
وتیشی: هەر ئەمڕۆ بەڕێز د.فواد حوسێن دوای گفتوگۆ
لەگەڵ لایەنە سیاسیەکانی عێراقی گەڕاوەتەوە کوردستان و بە مەكتەبی سیاسیی پارتی
ڕاگەیاندووە كە لایەن و کەسایەتییە سیاسییەکان و حكوومەتی عێڕاقی فیدراڵ بۆ
چارەسەرکردنی ئەو کێشەیە بەڵێنی ئەوەیان داوە کە لە چەند ڕۆژی داهاتوودا پرسی
ناردنی مووچە و شاییستە داراییەکانی هەرێمی كوردستان چارەسەر بکرێت.
بارەگای بارزانی ئاماژەى بەوەشکردوە، هەر لەسەر
داوا و بەڵێنی ئەوان و لەپێناو بەردەوامبوونی گفتوگۆیەكی هێمنانە و ڕەچاوکردنی
بارودۆخ و بەرژەوەندیی گشتی، پێمان باش بوو دوا دەرفەت بە حكوومەتی عێراقی فیدراڵ
لە بەغدا بدەین بۆ ئەوەی ڕێگەیەک بۆ کۆتایهێنان بەم کێشەیە بدۆزنەوە.
بارەگای بارزانى دەشڵێت: هەمیشە بروامان بەوە
هەبووە کە ئەگەر ڕێگەی گفتوگۆ هەبێت ئێمەش پێمان باشە بە لەیەکتر تێگەیشتن كێشەكان
چارەسەر بكەین.