997 جیهان

ئەردۆگان: مەسعود پزیشکیان کە دەچێتە تەورێز بە تورکی و لەناوچەکوردنشینەکانیش بە کوردی قسە دەکات

06:33 - 07/07/2024

زەمەن - جیهانى

 

رەجەب تەیب ئەردۆغان، سەرۆککۆماری تورکیا رایگەیاند، مەسعود پزیشکیان کە دەچێتە تەورێز بە تورکی و لە ناوچە کوردنشینەکانیش بە کوردی قسە دەکات.

 

لەمیانی گەڕانەوەیدا لە ئەڵمانیاوە کە بەمەبەستی سەیرکردنی یاری نێوان هەڵبژاردەکانی تورکیا و ئەڵمانیا چووبوو، رەجەب تەیب ئەردۆغان وەڵامی پرسیاری رۆژنامەوانانی دایەوە.

 

ئەردۆغان لەبارەی مەسعود پزیشکیان، سەرۆککۆماری نوێی ئێران رایگەیاند: " پزیشكیان تورکێکی بە رەچەڵەک ئازەرییە. ئەو کە دەچێتە تەورێز بە تورکی و لە ناوچە کوردنشینەکانیش بە کوردی قسە دەکات. فارسییەکی زۆر باشیش دەزانێت".

 

گوتیشی، "کە گەڕامەوە پیرۆزبایی لێدەکەم، پشت بەخوا لەمەودوا پەیوەندییەکانی نێوان تورکیا و ئێران باشتر دەبێت، تورکیا باشترین پەیوەندیی لەبارەی پرسەکانی ناوچەکە لەگەڵ ئێران هەیە".

 

مەسعود پزیشکیانی ریفۆرمخواز لە میانی چواردەیەمین هەڵبژاردنەکانی سەرۆکایەتی ئێراندا، کە رۆژی هەینی خولی دووەمی بەڕێوەچوو، زۆرینەی دەنگەکانی بەدەستهێنا و بووە نۆیەمین سەرۆککۆماری ئێران.

سۆشیال میدیا

ڕۆژنامەی زەمەن