دەقی تەمەن /29
06:05 - 21/06/2022
86 جار خوێندراوەتەوە
ناڵە حەسەن/ کولتوری زەمەن
١
ژیان پڕاوپڕە
لە پێشبینی و لە بڕیار و
هەڵبژاردە
مەرج نییە هەمووجار
ڕادەی زانین ئاستی هێز دیاری
بکات لە تۆدا
دەکرێت بە ڕێکەوت ئاراستەیەک
بگریتە بەر
دواجار وەک گەریدەیەکی
گۆڕەپانی هەرەس
شوناسی خۆت لێ ون ببێت
لەوسەردا
٢
لە چرکەساتە نائومێدییەکان
کە ڕووناکی لە پەنجەرەوە دێتە
ژوورەوە
لەنێو گورزە تیشکەکانا
هەست بە جوانییەکانی سروشت
دەکەی
کە بەهۆیانەوە دەروونە
خەمناکەکان
کەمێک ئارام دەبنەوە
چونکە جوانی ئەو هێزەیە
هەمیشە / مرۆڤەکان پەیوەست
دەکات بە ژیانەوە
٣
من لەنێو
گەڕانەکانم بەدوای خۆمدا
تاکو ئێستا
هەر بەوە گەیشتووم
کە کتێبێکی تر و ناوێکی ترم
بۆ تەنیایی
٤
لەنێو بیرکردنەوەکانی مندا
ژیان / تەنافێکە لە بێهوودەیی
بە چەرچەف و جلی ڕەنگاوڕەنگ
داپۆشراوە
عەشقیش / وەک چەند دڵۆپە
فرمێسکێک
تنۆک تنۆک
بەسەر / تەناف و چەرچەف و جلەکان
دێتەخوارەوە
٥
قاچەکانم لە زەوی بێزارن و
دەستەکانیشم لە جەستەم
چاوەکانم لە ڕووناکی و
خۆیشم لە ژیان
٦
چ ئافات و ئەسەفێکی گەورەیە
بەهای جوانییەکان
گەیشتوونەتە شوێنە بڵندەکانی پووچی
لەوەش ئەسەف و ئافاتتر
مرۆڤەکان هەریەکە و
بەرماڵێکیان ڕاخستووە
ناولەپی دەستەکانییان
سەیری ئەستێرە دوورەکان دەکەن
٧
لەنێو دەقە شیعرییەکانم
تا تابلۆی دڵۆپە فرمێسکێکی
ئاگر دەکێشم
هەموو دۆزەخەکان
دەمکەن بە قەسیدەیەکی درێژ و
بەڕێنووسە ڕەشبینییە
ڕەشۆکییەکان
لە نیو کتێبە خەڵووزییەکاندا
/ دەمنووسنەوە
٨
گەر داوا بکەی
ئاسمان دەکەم بەماڵی تۆ
مانگ و ئەستێرەکانت بۆ
دەستەمۆ دەکەم
یان لەسەر ڕووی دەریا
فەرشی سوورت بۆ ڕادەخۆم
جووڵەی شەپۆلەکانت بۆ ڕادەگرم
کەڕنەڤاڵی پەپوولەت بۆ نمایش
دەکەم
بەس تۆش / تەوقی
ئەم بێدەنگییەت بشکێنە
٩
من لەنێو چاوەکانی تۆ
فانۆسێکی شووشە ڕەشی
بە تەنیدارم
تۆش لەنێو نیگاکانی من
ئەو مۆمە گەش و درەوشاوەی
کە لە یەکەم شەوی عەشق
لەنێو لەپی دەستەکانم /
دامگیرساندی
١٠
ژنێک لە نێو مندایە
بزە گەرم و قژ خەنەیی
هەموو ڕۆژێ و هێدی هێدی
بە قەڵەمە نووک تیژەکانی
غرووریم
ئەفسانەی پیاوەتیم دەنووسێتەوە
نەرم نەرمیش
خۆم و خەونە گەورەکانم
دەخاتە ژێر پرسیارەوە
١١
من شاعیرێکم
لەگەڵ هەموو
بازنە و چوارچێوەیەک
ناتەبا دێمەوە
تەنها چوارچێوەی عەشقی تۆ
نەبێ
ئارەزوو دەکەم بۆ تا ئەبەد
لەنێویدا بمێنمەوە
١٢
وریابە ئەی شۆخ
لە چرکە ساتەکانی
تێکئاڵان و ڕامووسانیدا
توند توند مەمگوشە
با دڵی پڕ لە نائومێدی و
جەستەی ماندووم
لەنیو باوەش و دەستەکانتا
وردو خاش نەبێ و
گەرد گەرد / نەبێ بە تۆز و با
١٣
تابلۆکانی غوربەتم
پڕن لە ڕەنگەکانی بێدەنگی
ڕووباری شیعرەکانیشم
پڕ لە شەپۆل و هاوار
١٤
ئاگاییم لە جەستەم جیابۆتەوە
لەنێو تەرمی کەنار ڕێگاکان
خۆم ناسییەوە
لەدوای جەنگ تەرمەکان کۆدەکرێنەوە
ئاگر زەردەخەنەیان بۆ دەکات و
دواتر خۆڵەمێشەکەیان
تێکەڵ بە سروشت دەکاتەوە
١٥
ئەی شەهێنە بن باڵ شینەکە
دوو چاو بەشم ناکات بۆ ڕوانین
دەمەوێت فڕینەکانت ببینم
ئەودەمەی
لە ئاسمانە پڕ سترێسەکەی
نیشتیمان
هەور بۆت دەچەمێتەوە و
پەنجەرەکانی جوانیش یەکبەدوای
یەک دەکرێنەوە
تۆش دوور دوور دەڕوانی
منیش لێرەوە / بە خەندەیەکی
خەمناکەوە
نیگاکانم تێکەڵ بە نیگاکانی
ژیان دەکەمەوە
لەم چرکەساتە سەرمەدییەدا خۆم
لەبیر دەکەم و
مۆرفیم و میلۆدییەکانی مردنیشم
/ بیردەچێتەوە ...!
جۆزەردانی ٢٠٢٢