کوردستان

لاهور شێخ جەنگی سوپاسی رۆڵی نێچیرڤان بارزانی دەکات

10:25 - 04/05/2021 203 جار خوێندراوەتەوە

زەمەن_هەرێمی كوردستان

 

شاندی سەرۆكایەتی هەرێم و یەكێتی نیشتمانی كوردستان، جەخت لە هێنانە كایەی كەشێكی ئارام دەكەنەوە و لاهور شێخ جەنگیش سوپاسی رۆڵی نێچیرڤان بارزانی دەکات.


ئەمڕۆ لاهور شێخ جەنگی و بافڵ تاڵەبانی هاوسەرۆكانی یەكێتی و ژمارەیەک لە ئەندامانی دەستەی کارگێڕی و مەکتەبی سیاسی ئەو حزبە، لە دەباشان پێشوازییان کرد لە نێچیرڤان بارزانی سەرۆکی هەرێمی کوردستان و شێخ جەعفەر شێخ مستەفا و مستەفا سەیدقادر جێگرانی سەرۆکی ھەرێم.


لە دیدارێکدا گفتوگۆ کرا دەربارەی دوایین گۆڕانکاری و پێشهاتەکان و دۆخی سیاسیی ئێستا و پەیوەندی نێوان لایەنە سیاسییەکان و کێشەکانی نێوان هەرێم و بەغدا و هەڵبژاردنی پێشوەختەی ئەنجوومەنی نوێنەرانی عێراق و پرسی نووسینەوەی دەستورێکی نوێ بۆ هەرێمی کوردستان. ئەوەش بەپێی راگەیەندراوێكی هاوسەرۆكی یەكێتی.


جەختکرایەوە لەسەر بەردەوامی گفتوگۆی هەمەلایەنە و پێویستیی یەکڕیزی و تەبایی نێوان لایەنەکان و لێکتێگەیشتنی هاوبەش و کاری پێکەوەیی لە پێناو درووستکردنی متمانەیەکی بەهێز بۆ چارەسەرکردنی کێشەکان بە گەڕانەوە بۆ ئەو ڕێککەوتنە ئیمزاکراوانەی کە لە نێوان لایەنەکان هەیە بە تایبەت لەسەر بابەتە نیشتیمانی و ستراتیژییەکان لە پێناو پاراستنی بەرژەوەندییە باڵاکانی گەلەکەمان.

هاوکات جەختکرایەوە لەسەر درووستکردنی کەشێکی ئارام و وەلانانی کێشە و ناکۆکییە سیاسییەکان و دۆزینەوە و دیاریکردنی چوارچێوەیەکی هاوبەش کە جێگەی ڕەزامەندی هەموو لایەنەکان بێت بۆ پاراستنی بەرژەوەندی و دەستکەوتەکان و بەرگریکردن لە مافەکان.


لاهور شێخ جەنگی دەڵێت: سوپاسی نێچیرڤان بارزانی سەرۆکی هەرێمی کوردستانمان کرد بۆ ئەو ڕۆڵە نیشتیمانییەی کە دەیبینێت بۆ کۆکردنەوەی لایەنەکان و لێکنزیککردنەوەی بیروبۆچوونە جیاوازەکان.


وتیشی: لێکتێگەیشتنی زیاتری نێوان لایەنەکانمان بە پێویست زانی بە جۆرێک کە بەرژەوەندیی گشتی زاڵ بکرێت لە پێناو داکۆکیکردنی زیاتر لە مافە نەتەوەییەکان و بەھێزی پێگەی کورد لە بەغدا بە تایبەت لە ناوچە کێشەلەسەرەکان و نەفەوتانی دەنگی کورد.

سۆشیال میدیا

ڕۆژنامەی زەمەن

  • یەک ڕۆژ
  • یەک هەفتە
  • یەک مانگ
Advertisement