کوردستان

لاهور شێخ جەنگى: چیتر قبوڵ ناكرێت هاووڵاتیان بكرێن به‌ قوربانی گه‌نده‌ڵی

04:58 - 03/12/2020 392 جار خوێندراوەتەوە

"زەمەن" 


هاوسەرۆکى یەکێتى رایگەیاند، چیتر قبوڵ ناكرێت هاووڵاتیانی هه‌رێمی كوردستان، بكرێن به‌ قوربانی گه‌نده‌ڵی و ناڕۆشنی و ململانێ سیاسییه‌كان.


لاهور شێخ جەنگى هاوسەرۆکى یەکێتى پەیامێکى لەبارەى خۆپیشاندانەکانەوە بڵاوکردەوە و رایگەیاند، "ده‌مه‌وێت دڵنیابن كه‌ من له‌گه‌ڵ داوا حه‌ق و ره‌واكانی ئێوه‌م و پشتیوانیتان لێ ده‌كه‌م. وه‌كو سه‌رۆكایه‌تیی یه‌كێتیی نیشتمانیی كوردستانیش له‌وه‌ به‌ئاگاین كه‌ چیتر قبوڵ ناكرێت هاووڵاتیانی هه‌رێمی كوردستان، بكرێن به‌ قوربانی گه‌نده‌ڵی و ناڕۆشنی و ململانێ سیاسییه‌كان".

هاوسەرۆکى یەکێتى دەڵێت، له‌ ئێستادا كه‌ ماڵ به‌ ماڵ و شه‌قام و شاره‌كانی كوردستان، به‌ده‌ست دواكه‌وتنی مووچه و خراپبوونی ئاستی ژیان و بژێوییان ده‌ناڵێنین و، بێهیوایی و توڕه‌یی په‌نگده‌خواته‌وه، منیش له‌گه‌ڵ ئێوه نیگه‌رانم، هه‌موو هه‌وڵه‌كانم چڕ كردۆته‌وه بۆ كۆتاییهێنانی یه‌كجاری به‌ كێشه‌ی مووچه خۆرانی خه‌ڵكی كوردستان.

دەقى پەیامەکە:

پەیامێک لە لاهور شێخ جەنگییەوە

هاووڵاتیانی خۆشه‌ویست
ده‌مه‌وێت دڵنیابن كه‌ من له‌گه‌ڵ داوا حه‌ق و ره‌واكانی ئێوه‌م و پشتیوانیتان لێ ده‌كه‌م. وه‌كو سه‌رۆكایه‌تیی یه‌كێتیی نیشتمانیی كوردستانیش له‌وه‌ به‌ئاگاین كه‌ چیتر قبوڵ ناكرێت هاووڵاتیانی هه‌رێمی كوردستان، بكرێن به‌ قوربانی گه‌نده‌ڵی و ناڕۆشنی و ململانێ سیاسییه‌كان.

له‌ ئێستادا كه‌ ماڵ به‌ ماڵ و شه‌قام و شاره‌كانی كوردستان، به‌ده‌ست دواكه‌وتنی مووچه و خراپبوونی ئاستی ژیان و بژێوییان ده‌ناڵێنین و، بێهیوایی و توڕه‌یی په‌نگده‌خواته‌وه، منیش له‌گه‌ڵ ئێوه نیگه‌رانم، هه‌موو هه‌وڵه‌كانم چڕ كردۆته‌وه بۆ كۆتاییهێنانی یه‌كجاری به‌ كێشه‌ی مووچه خۆرانی خه‌ڵكی كوردستان. له‌م پێناوه‌شدا، گفتوگۆكانی دوێنێ شه‌ومان له‌گه‌ڵ به‌ڕێز سه‌رۆك وه‌زیرانی عێراق، ته‌رخان كرا بۆ چۆنییه‌تی چاره‌سه‌ركردنی ئه‌م كێشه و هه‌ژارییه‌.

سه‌رۆك وه‌زیرانی عێراق هاوخه‌میی خۆی نیشاندا به‌رامبه‌ر نیگه‌رانییه‌كانی ئێمه و ئێش و ئازاری مووچه خۆر و مافخوراوه‌كانی كوردستان، و جارێكی تر به‌ڵێنی دا، و به‌ڵێنمان لێ وه‌رگرت كه‌ ده‌رچه‌یه‌كی یاسایی بدۆزێته‌وه تا بتوانێت به‌شێك له‌و پاره‌یه‌ی كه‌ به‌ یاسای قه‌رز به‌ده‌ستیان هێناوه، بۆ مووچه‌ خۆرانی گه‌له‌كه‌مان سه‌رف بكات.

 هه‌ر له‌و گفتوگۆیه‌دا، به‌ تێگه‌یشتن له‌ دۆخی خراپی زۆرینه‌ی خه‌ڵك، له‌م وه‌رزی سه‌رما و بێ مووچه‌ییه‌دا، داوامان كرد چاره‌سه‌رێكی بنچینه‌یی بكرێ بۆ كێشه‌ی بودجه‌ و مووچه‌ی هه‌رێمی كوردستان. سه‌رۆك وه‌زیران پێشنیاری كرد كه رۆژی یه‌كشه‌ممه ٦ی ١٢ی ٢٠٢٠ كۆبوونه‌وه‌ی لوتكه‌ی لایه‌نه‌ سیاسییه‌كانی عێراق ئه‌نجام بدرێ. پێشوازیمان له‌و پێشنیاره كرد. دڵنیا بن به‌نده به‌ نوێنه‌رایه‌تی ئێوه و هه‌موو مووچه خۆرانی هه‌رێم له‌و كۆبوونه‌وه‌یه‌ به‌شدار ده‌بین، به‌رگری له‌ مافه‌كانتان ده‌كه‌ین و هه‌موو هه‌وڵێك ده‌ده‌ین پشك و مافه‌ ره‌واكانتان له‌ بودجه‌ی فیدراڵی ٢٠٢١ دا جێگیر بكرێت و به‌ یه‌كجاری ئه‌م كێشه درێژخایه‌نه‌ كۆتایی پێ بێت.
لێره‌شه‌وه، دوای ئه‌و پشوو درێژییه بێ وێنه‌یه‌ی به‌رامبه‌ر كه‌مته‌رخه‌می و نابه‌رپرسیارێتییه‌كانی حوكمڕانی نیشانتانداوه، داواتان لێ ده‌كه‌ین چه‌ند رۆژێكی تریش دان به‌ خۆتاندا بگرن، به‌وپه‌ڕی دڵسۆزی و توانا، به‌رگریكاری مافه‌كانتان ده‌بین.
ئه‌گه‌ریش بڕیارتانداوه گردبوونه‌وه و خۆپیشاندانتان هه‌بێت، به‌ هێمنی و له‌ چوارچێوه‌ی خۆی دا ئه‌نجامی بده‌ن، رێگه‌ مه‌ده‌ن چالاكییه‌كانتان ببێته مایه‌ی زیان گه‌یاندن به‌ كاسبكار و ئه‌و جووڵه‌ كه‌مه‌ی له‌ بازاڕه‌كاندا ماوه. با هاونیشتمانییان له‌وه‌ زیاتر زه‌ره‌رمه‌ند نه‌بن.

داواش له‌ هێزه‌ ئه‌منییه‌كان ده‌كه‌ین، نه‌بنه هۆكاری زیان گه‌یاندن به‌ ناوبانگی خۆیان و بزانن كه‌ خۆپیشانده‌ران، خانه‌نشین و مامۆستا و كارمه‌ندان و مووچه‌خۆران، خوشك و برا و كه‌سوكاری ئێمه‌ن، ته‌نها رێز گرتن و پاراستنیان ، ئاشتی كۆمه‌ڵایه‌تی و رێگه‌ی راستی بووژاندنه‌وه‌ی كوردستان هه‌موار ده‌كات.هه‌ر لێره‌وه داواشیان لێ ده‌كه‌ین به‌ زووترین كات هه‌موو ئه‌و كه‌سانه ئازاد بكه‌ن كه‌ به‌هۆی به‌شداریان له‌ خۆپیشاندان بۆ داواكردنی مافه‌كانیان ده‌ستگیر كراون.

هه‌ڵوێست و سیاسه‌تی چه‌ند ساڵی رابردوومان، و ئه‌و به‌هایانه‌ی یه‌كێتیی نیشتمانیی كوردستانی له‌سه‌ر دامه‌زراوه و نوێ كراوه‌ته‌وه، شاهید و هانده‌رن له‌سه‌ر ئه‌وه‌ی كه‌ هه‌میشه له‌ به‌ره‌ی خه‌ڵك و داوا حه‌ق و ره‌واكانیان بووین. ئێستاش هه‌مان بیر و باوه‌ڕ درێژه پێ ده‌ده‌ین،‌ و دووپاتی ده‌كه‌ینه‌وه كه روبه‌ڕوبوونه‌وه‌ی خۆپیشانده‌ران بڕیار و سیاسه‌تی یه‌كێتی
نه‌بووه و نابێت.

سۆشیال میدیا

ڕۆژنامەی زەمەن

Advertisement