کوردستان

تووشبوون به‌ كۆرۆنا ١١ هه‌زاری له‌ هه‌رێم تێپه‌ڕاند

08:54 - 21/07/2020 68 جار خوێندراوەتەوە

زه‌مه‌ن-هه‌ولێر


وەزارەتی تەندروستیی هەرێمی کوردستان دوا ئاماری توشبوانی كۆرۆنای بڵاوكرده‌وه‌ كه‌ تا ئێستا 11 هه‌زار نه‌خۆش له‌ هه‌رێم تۆماركراون و له‌و ژماره‌یه‌ش نیوه‌ زیاتری چاكبونه‌ته‌وه‌و زیاتر له‌ 400 توشبوش گیانیان له‌ده‌ستداوه‌.


وەزارەتی تەندروستیی ئاماژەی بەوەشکردووە کە لە سەرەتای سەرھەڵدانی ڤایرۆسی کۆرۆناوە تا ئێستا ١٧٦ هەزار و ٧٧٧ پشکنین لەسەر ئاستی هەرێمی کوردستان ئەنجامدراوە کە ٧٥ هەزار و ٥٢٩ لە هەولێر، ٥٨ هەزار و ٣٦٣ لە سلێمانی، ٤١ هەزار و ١٧٠ لە دهۆک و هه‌زار و ٧١٥ لە هەڵەبجە بووە.

ئاماژە بەوەشدراوە کە لە ٢٤ کاتژمێری رابردوودا، ١٠٦ نەخۆش دوای چارەسەری پزیشکی چاکبوونەوەتەوە کە ٦١ له‌ هەولێر، ٢١ له‌ گه‌رمیان، هه‌شت له‌ دهۆك و ١٦ له‌ هه‌ڵه‌بجه‌ بووە.

بەپێی داتاکانی وەزارەتی تەندروستی حکوومەتی ھەرێمی کوردستان، کۆی گشتی تووشبووان بە ڤایرۆسی کۆرۆنا لە ھەرێمی کوردستان گەیشتووەتە ١١ هەزار و ١٠٩ تووشبوو کە دوو هه‌زار و ٩٧٥ لە هەولێر، حه‌وت هەزار و ٤٢١ لە سلێمانی، ٣٤٣ له‌ دهۆک و ٣٧٠ لە هەڵەبجەیە، لەنێویاندا ٤١٩ حاڵەتی گیانلەدەستدان ھەیە کە ٧٦ له‌ هەولێر، ٣٣٦ له‌ سلێمانی و حه‌وت لە هەڵەبجە بووە، و شه‌ش هەزار و ٤٤ نەخۆش چاکبووەتەوە کە دوو هه‌زار و ٣١ لە هەولێر، سێ هه‌زار و ٤٨٤ لە سلێمانی، ٢٧٤ لە دهۆک و ٢٥٥ هەڵەبجە بووە، و لە ئێستادا چوار هەزار و ٦٤٦ نەخۆش لەژێر چاودێری پزیشکییدان کە ٨٦٨ لە هەولێر، سێ هەزار و ٦٠١ لە سلێمانی، ٦٩ لە دهۆک و ١٠٨ لە هەڵەبجەن.

وەزارەتی تەندروستیی ھەرێمی کوردستان وێڕای دەستخۆشی بۆ پزیشکان و کارمەندانی تەندروستی و هەموو تیمەکانی پزیشکی کە لە ئەرکدان، داوای لە هاووڵاتییان کردووە پابەندبن بە رێنماییەکانی تەندروستیی و دوورکەوتنەوە لە شوێنی قەرەباڵغ و دانانی ماسک و دەستکێش، هەروەها لەکاتی پێویستدا پەیوەندی بە هێڵی گەرمی ژمارە (١٢٢) بکەن.

سۆشیال میدیا

ڕۆژنامەی زەمەن

Advertisement