هەواڵ

وەزیرى بازرگانى: نرخى خۆراک هیچ گران نەبووە

11:11 - 20/03/2020 103 جار خوێندراوەتەوە

"زەمەن" 

وەزیرى بارزگانى حکومەتى هەرێم رایدەگەیەنێت، بە وردى چاودێرى بازاڕ دەکەن و ناهێڵن هیچ بازرگان و کەسێک نرخى پێداویستییەکانى هاوڵاتیان بەرزبکاتەوە.


کەمال موسلیم وەزیرى بارزگانى و پیشەسازى حکومەتى هەرێم لەم دیمانەیەدا جەختى لەوە کردەوە، بەهۆى کۆرۆناوە دۆخى بازاڕ روى لە ناجێگرى نەکردووە و نرخى خۆراک و پێداویستییەکانى هاوڵاتیان جگە لە هێلکە و پیاز، وەک خۆیان ماونەتەوە و بەرزنەبوەتەوە.

 

زەمەن: ئەوەندەی چاودێری بازاڕتان کردووە ئایا نرخی خۆراکی رۆژانە چۆنە؟
کەمال موسلیم: لە ئێستادا نرخى خواردەمەنى و پێداویستییەکانى رۆژانەى هاوڵاتیان وەک خۆیەتى و بەرزنەبوەتەوە، جگە لە نرخى هێلکە و پیاز کە پیاز زیاتر لە ئێرانەوە هاوردە دەکرێ و لە ناوخۆى ئێران گرانبووە، سەبارەت بە هێلکەش دوێنێ لەگەڵ ژورى بازرگانى هەولێر و بازرگانەکان کۆبوینەوە، یەکێک لەو کەسانەى کە ئامادەبوو، خاوەنى کێڵگەیەکى بەرهەمهێنانى هێلکە بوو، باسى لەوەکرد کە هیچ کێشەیەکى هێلکەیان نییە و دەتوانن بەشى پێداویستى دابین بکەن و لەبارەى سلێمانیشەوە وتى دەتوانین بەشى ئەوێش دابین بکەین و کێشەى کەمى هێلکە دروست نەبێت.

زەمەن: کەواتە بۆچى هێڵکە لە سلێمانى گرانبووە؟
کەمال موسلیم: تا ئێستا ئەوە روون نییە، دوو سبەى خۆم سەردانى ئەو کێڵگە پەلەوەرییانە دەکەم کە هێلکە بەرهەم دەهێنن و بەدواى سەرچاوەکەیدا دەگەڕێم، ئەگەر هێلکە لە کێڵگەکان زۆر بێت لێکۆڵینەوە دەکەین بزانین لە بازاڕدا بۆ گران بووە.

زەمەن: هاوردەکردنی خۆراک لە ئیران و تورکیاوە چۆنە؟
کەمال موسلیم: لە ئێستا بەشێوەیەکى ئاسایى هاوردەکردنى پێداویستییەکانى هاوڵاتیان لەهەردوو وڵاتى لە ئیران و تورکیا بەردەوامە و ئێمەش زیاتر تەرکیزمان لەسەر هاوردەکردنى خۆراک و پێداویستى پزیشکییە.

زەمەن: واتا کۆرۆنا هیچ کێشەیەکى بۆ هاوردەکردنى پێداویستییەکان دروست نەکردووە؟
کەمال موسلیم: بەهۆى ئەو رێکارانەى کە لە دەروازەکان بۆ خۆپارێزى لە کۆرۆنا دەگیرێنەبەر هاوردەکردن لاواز بووە و بە خێرایى نایەت و ئەو ئۆتۆمبێلانەى کە پێداویستییەکان لە ئێرانەوە هاوردە دەکەن کەمبونەتەوە، بەڵام هیچ کێشەیەکى گەورە دروست نەبووە و هاوردەکردن بەردەوامە.

زەمەن: ئەوە کاریگەرى نەکردوەتە سەر گرانبوون و کەمبوونەوەى پێداویستییەکان لە بازاڕدا؟
کەمال موسلیم: نەخێر، خۆم سەردانى بازاڕ و سوپەرمارکێتەکانم کردووە، هەموو شتێک زۆرە و هیچ پێداویستیەکى سەرەکى هاوڵاتیان نییە کەم بوبێتەوە و وەک پێشتریش باسم کرد نرخەکان گران نەبوون.

 

زەمەن: چ رێوشوێنێک دەگرنە بەر لەبەرامبەر ئەوانەی قۆرخکاری دەکەن؟
کەمال موسلیم: بە دڵنیاییەوە هەموو رێکارێکى یاسایی دەگرینەبەر و تا ئێستاش زۆر کەس و شوێن سزا دراون کە پابەند نەبوون بە رێنماییەکانەوە.

زەمەن: کۆبونەوەتان لەگەڵ بازرگانەکان کرد دوێنێ.. داواکاریان لە حکومەت چی بوو؟
کەمال موسلیم: بازرگانەکان دەیانەوێت کار ئاسانى زیاتریان بۆ بکرێت و ئەگەر بکرێت ژمارەى ئەو ئۆتۆمبێلانە زیاد بکرێن کە پێداویستییەکان هاوردە دەکەن، هەروەها لە درەوازەکان فەرمانبەر زیاد بکرێن بە تایبەت لە حاجى ئۆمەران و باشماخ بۆ ئەوەى کارەکان خێراتر بەڕێوەبچن.

سۆشیال میدیا

ڕۆژنامەی زەمەن

Advertisement