550وتار

شەڕی پەکەکە و پارتی لەقازانجی کێدایە؟

11/10/2020 9:10:00 AM

شەنکار عەبدوڵا

مێژووی ململانێی پارتی و پەکەکە دێرینترە لەم رووداوەی چەند رۆژی پێشوو؛ کەگرژییەکان نزیکبونەوە لە ئاستی پێکدادان.

خۆشبەختانە ئەمجارە دەنگی دژە شەڕ یان دژی شەڕی براکوژی لەهەموو کات بڵندتربوو، رەنگە چیتر شەڕ ڕەواجی نەمابێ؛ چونکە هەمووان لە نەهامەتی و لێکەوتەکانی شەڕی ناوخۆ گەیشتوون؛ لە
حەفتاکانی سەدەی پێشووە هەتا 1996.

ئەوەی بەم دوواییە روویدا لەنێوان پەکەکە و پارتیدا؛ کە پەکەکە لوغمی دانابوو؛ بەهۆیەوە پێشمەرگەیەک شەهیدبوو، لەگەڵ برینداربوونی چەند پێشمەرگەیەکی تردا زەنگێک بوو بۆ شەڕ، بەڵام خۆشبەختانە نەگەیشتە شەڕی گەرم؛ یان هەر سارد ماوەیە، ئەمەش ئاهێکی بەبەر هەموو کوردستانیەکی دڵسۆزدا هێنایەوە،کە رەنگە ئەگەر هێزێکیش بیەوێ شەڕ بەرپا بکات، ئەوە هێزەکەیتری بەرامبەری ئامادەی ئەو شەڕە نەبێ، ئەمەش کارێکی یەجگار عەقڵانی بوو.

لەئێستادا؛ کە دۆخی کوردستان و عێراقیش لەرووی ئابورییەوە باش نییە؛ هەڵیسانی هەر شەڕێک لەبەرژەوەندی کورددا نیە و کەس نازانێ ئەنجامەکەی چی دەبێ.
لەلایەکی تریشەوە برایانی پەکەکە دەبێ موراعاتی بارودۆخی هەرێم بکەن و بەوپەڕی بەرپرسیارێتیەوە مامەڵە بکەن، چونکە هەرێم تاکە شوێنێکە بۆ کوردانی هەرچوارپارچەکە؛ کەبتوانن بەئازادی تیایدا بژین؛ لەم سۆنگەیەشەوە ئەرکی ئەخلاقی هەموومانە،کە پارێزگاری لێبکەین و نەی ئاڵێنین، بە جەنگی دوژمنانەوە.

چونکە مەعلومی هەموومانە؛ کە لەماوەی؛ پێشوودا رەجەب تەیب ئەردۆگان؛ سەرۆککۆماری تورکیا بەڕاشکاوی وتی، پەکەکە لەهەرکوێ بێ؛ ئێمە دەچین بۆ ئەو شوێنە و خوێنی سەربازێکمان لەهەر شوێنێ برژێ، لەوێ ناکشێینەوە؛ ئەم پەیامەی ئەردۆگان دروست بۆ هەرێم بوو؛ چونکە ئەردۆگان لە ئێستادا لەژێر فشاری پارتی نەتەوە پەرستی تورکیا (مەهەپە) دایە، ئەو حزبە بەردەوام ئەردۆگان تۆمەتبار دەکات بەوەی کە ئەو دەرفەتی زیاد لەپێویستی بەکوردەکانی هەرێمداوە و دەبێ ئەو دەسەڵاتە بەجۆرێ لاوازبکرێ، کەهیچکات بیر لەدەوڵەت نەکاتەوە.

برایانی پەکەکە دەبێ باشتر بیربکەنەوە؛ لەوە تێبگەن؛ پەلهاویشتنیان بۆ قوڵایی هەرێم؛ جگە لە بیانودان بەدەستی تورکیاوە و هیچ شتێکی تر سەوز ناکات، بەڵکو لەقازانجی دوژمنانە.
بەیاننامەی هەریەکە لە ئەمریکا و عێراق و فەرەنسا بۆ پشتگیری هەرێم و دژی پەکەکە دەبێ پەکەکە بەئاگا بهێنێتەوە، کەهەرێم کیانێکی دەستوورییە و بەئاسانی بەقوڕگی هیچ دەوڵەتێکدا ناچێ، لەگەڵ ئەوەشدا، دەبێ هەموومان نەفرەت لە جەنگی کورد کوژی بکەین و سەرزەشتی ئەو کەس و لایەنانە بکەین، کەهانی شەڕی ناوخۆ دەدەن، چونکە لەم شەڕانەدا؛ جگە لە دووژمن، هیچ کوردێ سودمەند نابێ.