14 کوردستان

ئۆجالان: ئاشتییەکی ڕاستەقینە تەنها بە بێدەنگکردنی چەک و کۆتاییهاتنی شەڕبەدی نایەت

08:04 - 31/08/2025

زەمەن پرێس:
عەبدوڵا ئۆجالان لە نوێترین پەیامیدا بەبۆنەى رۆژی جیهانی ئاشتییەوە ڕایدەگەیەنێت، ئاشتییەکی ڕاستەقینە، تەنها بە بێدەنگکردنی چەک و کۆتاییهاتنی شەڕ و پێکدادان، بەدی نایەت. هەرکات ئازادی و دیموکراسی و دادپەروەری هەموو بوارەکانی ژیانی گرتەوە، ئەوکات ئاشتییەکی ڕاستەقینە دێتەدی.
عەبدوڵا ئۆجالان ڕێبەری زیندانیکراوی پەکەکە لە دوورگەى ئیمرالییەوە بەبۆنەی ١ـی ئەیلول، ڕۆژی جیهانیی ئاشتییەوە، پەیامێکی بڵاوکردەوە و رایگەیاندوە: بانگەوازەکەمان بۆ ئاشتی و چارەسەری دیموکراتیک، هەنگاوێکی سیاسیی ئاسایی نییە؛ بەڵکوو هەنگاوێکی ستراتیژیی و قۆناغێکی مێژووییە. بەم بانگەوازە، هەم لە تورکیا و هەم لە سەرانسەری ڕۆژهەڵاتی ناوەڕاست، دەرگای سەردەمێکی نوێ کراوەتەوە، تاوەکو ژیانی ئاشتییانە و دیموکراتیک جێگەی شەڕ و وێرانکاریی بگرێتەوە.
ئۆجالان ئاماژەی بەوەشکردوە، ئاشتییەکی ڕاستەقینە، تەنها بە بێدەنگکردنی چەک و کۆتاییهاتنی شەڕ و پێکدادان، بەدی نایەت. هەرکات ئازادی و دیموکراسی و دادپەروەری هەموو بوارەکانی ژیانی گرتەوە، ئەوکات ئاشتییەکی ڕاستەقینە دێتەدی.
دەقی پەیامەکە:
"بۆ ئەو کەسانەی لەپێناو ئاشتی و دیموکراسییدا تێدەکۆشن...
بانگەوازەکەمان بۆ ئاشتی و چارەسەری دیموکراتیک، هەنگاوێکی سیاسیی ئاسایی نییە؛ بەڵکوو هەنگاوێکی ستراتیژیی و قۆناغێکی مێژووییە. بەم بانگەوازە، هەم لە تورکیا و هەم لە سەرانسەری ڕۆژهەڵاتی ناوەڕاست، دەرگای سەردەمێکی نوێ کراوەتەوە، تاوەکو ژیانی ئاشتییانە و دیموکراتیک جێگەی شەڕ و وێرانکاریی بگرێتەوە.
ئەمە تەنها داخوازییەک نییە، بەڵکوو ڕاستییەکی بەرجەستەیە و پێویستە بە هەلی بەهێز و هەنگاوی پراکتیکی بەدی بهێنرێت. چونکە ئاشتییەکی ڕاستەقینە، تەنها بە بێدەنگکردنی چەک و کۆتاییهاتنی شەڕ و پێکدادان، بەدی نایەت. هەرکات ئازادی و دیموکراسی و دادپەروەری هەموو بوارەکانی ژیانی گرتەوە، ئەوکات ئاشتییەکی ڕاستەقینە دێتەدی.
گۆڕانی کۆمەڵایەتی تەنها مافێک نییە بۆ گەلانمان، بەڵکوو ئەرکی سەرەکییە لەم سەردەمە نوێیەدا.
حەتمەن بە تیکۆشانی گەلانمان، پایەکانی ئاشتی و دیموکراسی و بەهاکانی ئازادی قایمتر دەبن و لەنێو ژیانی کۆمەڵایەتییدا ڕەنگدانەوەیان دەبێت. ئیتر، ئەم وڵاتە دەبێتە وڵاتی ئەوانەی کە ئاشتی و ژیانی دیموکراتیک هەم وەک ماف و هەم وەک ئەرکی خۆیان دەبینن.
بەبۆنەی ١ـی ئەیلولەوە، بانگەواز لە گەلانمان دەکەم کە خاوەنداری لەم ئەرکە مێژووییە بکەن و ڕێپێوانی ئاشتی و ئازادی فراوانتر بکەن.
لەو بڕوایەدام، هەمووان لە جدییەت و هەستیاریی ئەم قۆناغە تێدەگەن و ڕەچاوی دەکەن و بە ڕۆحییەتێکی ئاشتیخوازانەوە هەنگاودەنێن. بەم بڕوایەوە، سڵاو و ڕێز و خۆشەویستی بێ‌پایانی خۆمتان ئاڕاستەدەکەم.
عەبدوڵا ئۆجالان
دوورگەی ئیمراڵی".