بۆ مارف عومەرگوڵ
08:51 - 15/01/2022
187 جار خوێندراوەتەوە
ئەحمەدی مەلا
ناو له‌پی خه‌جیجه
دوێنێ تایه‌كی كوشنده
وه‌كو جاجمێكی دوو قه‌دی ره‌وه‌ندان
نووشتاندمییه‌وه ده‌م كوانووی وڕێنه.
خه‌جیجه هات و له تامێسكه‌كانم هورد بووه‌وه،
له‌سه‌ر چۆك دانیشت،
ناوله‌پی خسته سه‌ر هه‌نیه‌م.
هه‌ردوو چاوم چووقاند،
هه‌ردوو بیلبیله‌م رۆچوونه نێو قووڵایی ئاو.
گوێم له نووزه‌ی توتكه سه‌گێ بوو،
پشیله فارسییه‌كه‌ی سه‌لمان،
جۆم رۆكرده حه‌وشه‌كه‌ی نالی،
له ئاستانه ده‌گه‌ڕامه‌وه،
پرچی ئایشه و فاتیمه
له گزینگی سینه‌مه‌وه په‌رت ده‌بوونه‌وه:
گمه‌ی كۆتره‌كانی سه‌ر پردی ته‌به‌قچه‌لی،
ئه‌سپه‌كه‌ی جه‌رجیس،
سێبه‌ره‌كانی "زاكیره‌ی با"،
ئه‌تڵه‌سه‌كانی ئه‌رپه،
مناره ئاوییه‌كانی ئاخر حوسێن،
پژدێنه كه‌سكه‌كه‌ی دانیال،
كراسه دڕاوه‌كه‌ی حه‌ویجه،
مه‌مكه تورته‌كانی قۆرییه،
تیترواسكه‌كه‌ی چیمه‌ن،
دار هه‌نجیره تاقانه‌كه‌ی تڕكه‌ڵان،
كراسه ره‌شه‌كه‌ی تسن،
كڵاوه‌كه‌ی ته‌مبه‌ڵ عه‌باس،
قه‌بره‌كه‌ی عاشوور،
گه‌ڵایه‌كی پاسوانزاده،
په‌نجه‌ره‌یه‌كی ئه‌ڵماس،
په‌رژینی ئارافه،
دووگردێكی ته‌په‌ی مه‌لا عه‌وڵا،
بێده‌نگیی كۆڕنیشی ساڵی 1975
عه‌با ره‌شه‌كه‌ی خاسه،
مشه‌ممای حه‌سیره‌كان،
ته‌پوتۆزی كوڕه و مه‌عده‌ن،
شڵپه‌ی منداڵانی شۆریجه،
مه‌سینه باغه‌كانی جووتقاوه،
به‌رده‌كانی ئیمام عه‌بباس،
مه‌غریبه‌كانی جریتمه‌یدان،
قۆریاته‌كانی هابه،
هه‌ریسه‌كانی كه‌ربه‌لا،
عاسییه‌كانی عه‌ره‌سه،
ته‌ڵبه‌نده‌كانی كه‌یوان،
هیسه‌كانی ته‌ركیز،
قه‌تاره‌كه‌ی ساڵانی چل،
پاسكیله‌كانی شه‌ریكه،
سه‌فه‌رتاسه لووسه‌كان،
شووتییه‌كانی ژێر هه‌نگڵی كرێكارانی رووس،
هه‌یبه‌تی ئه‌ڵمانه‌كان،
شوانه پاسه‌وانه‌كانی بۆڕییه نه‌وته‌كان،
ئاڵا داماوه‌كه‌ی عه‌بدولمه‌لیكی به‌نی مه‌ڕوان،
غه‌می ناوه‌ڕاستی حه‌فتا،
هۆشیاریی ته‌یره ئه‌بابیله‌كان،
پیاسه بێده‌نگه‌كه‌ی عه‌لی مامی،
پێكه‌نینه‌كه‌ی سمه قه‌تێ،
رووخۆشییه شۆڕشگێڕییه‌كه‌ی سه‌باح مه‌حموود،
بیژییه‌كه‌ی قوباد،
منداڵه سیحربازه‌كانی حه‌مید چكچكه،
نامه ساده‌كانی مسته‌فا،
پێشمه‌رگایه‌تییه نهێنییه‌كه‌ی سه‌باح،
دوو كوڕه به ئه‌ده‌به‌كه‌ی ئه‌حمه‌د ئه‌سوه‌د،
منداڵه شیوعییه‌كه‌ی شۆڕیجه،
چیرۆكه كورته‌كانی عه‌باس له‌ببان،
شانه نهێنییه‌كانی ئاگر،
خه‌ونه‌كانی سێوه‌دین،
نوكته‌كان سه‌یفودین،
عه‌شقه نهێنییه‌كانی مارف گوڵ،
قاپه ئیسپانییه‌كه‌ی مه‌دحه‌ت،
گه‌واڵه‌كانی سه‌ڵاح شوان،
سوخمه زه‌رده‌كه‌ی سه‌لام،
ده‌هۆڵه خێرا ره‌وته‌كه‌ی داوده،
جمكانه‌كه‌ی به‌رامبه‌ر ئاسۆ،
مه‌ڵۆتكه‌كه‌ی فه‌همی،
عه‌به‌سییه‌كه‌ی موكری،
پێكه‌نینه باوكانه‌كه‌ی جه‌بار،
شانۆكانی فازیل،
چایخانه لاپه‌ڕه‌كه‌ی سه‌ڕاج،
قژبژه‌كه‌ی جه‌لیل،
به‌هره‌وه‌ران،
كۆتایی حه‌فتاكان،
بێده‌نگی خاسه،
ئاگرباران،
خامۆشبوونی ئومولڕه‌بیعه‌ین،
كوژانه‌وه‌ی سه‌رجه‌می گڵۆپه‌كانی سه‌ر جاده،
بوومه‌له‌رزه‌یه‌كی بێوێنه و
منیش باڵم گرت:
گوێم له نووزه‌ی توتكه سه‌گێ بوو،
چاوم كرده‌وه،
خه‌جیجه له‌سه‌ر چۆك دانیشتبوو،
ناوله‌پی له‌سه‌ر هه‌نیه‌م،
مه‌چه‌كیم توند گرت:
بڵێ، چ موژده‌یه‌كت پێیه؟
وتی: بنوو، هیچ نییه،
هه‌مووی هه‌ر وڕێنه‌یه.