ساسان عەونى: ساڵانە بڕی 900 ملیۆن دینار بۆ سێکتەری گەشتوگوزار خەرج دەکرێت
11:47 - 29/11/2021
زەمەن_هەولێر
وەزیری شارەوانی و گەشتوگوزارى هەرێم رایگەیاند، ساڵانە بڕی 900 ملیۆن دینار
بۆ سێکتەری شوێنەوار و گەشتوگوزار خەرج دەکرێت.
ئەمڕۆ، دووشەممە 29/11/2021، کۆنفرانسی زانستیی شوێنەوار، بۆ پاراستن و پەرەپێدانی
شوێنەوار و کەلەپوور لە هەولێر بەڕێوە دەچێت و ساسان عەونی، وەزیری شارەوانی و گەشتوگوزار
لە کۆنفرانسەکەدا لە وتارێکدا رایگەیاند، شوێنەوار و کەلەپوور لە
ئەجێندای حکوومەتی هەرێمی کوردستاندا پێگەیەکی تایبەتی هەیە و شوێنەوار وەک شوسناس
و ناسنامەی نیشتمانی، وەک ئاوێنەیەکی درەوشاوەی مێژوو و ڕابردوومان، وەک ڕابردووی
میللەتێک کە بە درێژایی هەزاران ساڵ ڕەگ و ڕیشەی لەسەر خاکەکەی داکوتاوە، گرنگایەتیی
تایبەتی هەیە.
وتیشى، ''حکوومەتی هەرێمی کوردستان و خودی مەسرور بارزانی، سەرۆکی حکوومەتی
هەرێمی کوردستان و وەزارەتی شارەوانی و گەشتوگوزار بە گرنگییەوە لە ڕۆڵ و ئەرکی سێکتەری
شوێنەوار دەڕوانن''.
ساسان عەونی ئاماژەى بەوەشکرد، ''لە ڕوانگەی ئەو بایەخەوە سەرەڕای قەیرانی
دارایی، بە بڕیاری سەرۆکی حکوومەت ساڵانە بڕی 900 ملیۆن دینار بۆ سێکتەری شوێنەوار
و گەشتوگوزار خەرج دەکرێت. هەروەها کۆنفراسی داهاتی وەزارەتی شارەوانی و گەشتوگوزار
بڕیاری دا لەسەدا یەکی داهاتی شارەوانییەکان بۆ ئەم سێکتەرە خەرج بکات''.
وەزیری شارەوانی و گەشتوگوزار ئاشکرایشی کرد: لە چەند ڕۆژی ڕابردوودا تەنیا
لە سنووری پارێزگاری هەولێر بە هاوکاریی زانکۆی هارڤاردی ئەمریکا، زیاتر لە 750 شوێنی
شوێنەواری تۆمار کراون و کارکردن لەو سنوورە بەردەوامە. هەروەها لە پارێزگاکانی تریش
بە فراوانی کاری کنە و پشکنین بەڕێوە دەچێت و چەندان شوێنی شوێنەواری دۆزراونەتەوە
کە گۆڕانیان بەسەر گێڕانەوە باوەکانی ساڵانی ڕابردوودا هێناوە.