قوباد تاڵەبانى: پێویستە كار لەسەر بنبڕكردنی فیكری تیرۆریستی بكرێت
12:14 - 28/11/2021
زەمەن_هەرێمى کوردستان
جێگری سەرۆکی حکومەتی هەرێمی کوردستان ڕایگەیاند، مەترسییەکانی تیرۆرستانى
داعش هەر ماوە و پێویستە كار لەسەر بنبڕكردنی فیكری تیرۆریستی بكرێت.
قوباد تاڵەبانی جێگرى سەرۆکى حکومەتى هەرێم، پەیامێکى لەبارەى هێرشەکەی شەوی
ڕابردووی داعش بۆسەر هێزەکانی پێشمەرگە بڵاوکردەوە و تیایدا سەرەخۆشی لە کەسوکاری
شەهیدەکان و هیوای چاکبوونەوە بۆ بریندارەکان دەخوازێت.
لە پەیامەکەیدا قوباد تاڵەبانی دەڵێت، "ئەم پەلامارانە دەیسەلمێنن هێشتا
مەترسی ئەو گروپە تیرۆریستییە هەر ماوە، بۆیە پێویستە لایەنە پەیوەندیدارەکان لە
پێشمەرگە و سوپاى عێراق و هێزەکانی هاوپەیمانیی نێودەوڵەتی هەماهەنگی زیاتر بکەن
بۆ نەهێشتنی ئەو مەترسییە و دزەکردنی چەکدارانی داعش".
جێگری سەرۆکی حکومەتی هەرێمی کوردستان جەختدەکاتەوە، زۆر پێویستە كار لەسەر
بنبڕكردنی فیكری تیرۆریستی بكرێت.