نێچیرڤان بارزانى: هێرەشەكانی داعش پەیامی جددیی ترسناكن
10:09 - 28/11/2021
زەمەن_هەرێمى کوردستان
سەرۆکى هەرێمى کوردستان رایگەیاند، فراوانبوون و بەردەوامیی پەلامار و هێرشەكانی
داعش، پەیامی جددیی ترسناكن و هەڕەشە و مەترسییەكی ڕاستەقینە لە ناوچەكە دەهێنێتەوە
ئاراوە.
نێچیرڤان بارزانى سەرۆکى هەرێمى کوردستان پەیامێکى لەبارەی هێرشەكەی شەوی ڕابردووی
داعش بڵاوكردەوە، كە بووە هۆی شەهیدبوونی پێنج پێشمەرگە و برینداربوونی چواری دیكە،
سەرەخۆشی لە خانەوادەی پێشمەرگەكان كردووە و هیوای زوو چاكبوونەوەی بۆ بریندارەكان
خواستووە.
سەرۆکى هەرێم لە پەیامەکەیدا دەڵێت، فراوانبوون و بەردەوامیی پەلامار و هێرشەكانی
داعش، پەیامی جددیی ترسناكن و هەڕەشە و مەترسییەكی ڕاستەقینە لە ناوچەكە دەهێنێتەوە
ئاراوە. بۆیە هاریكاری و هەماهەنگیی زیاتری نێوان پێشمەرگە و سوپای عیراق بە پشتیوانیی
هێزەكانی هاوپەیمانیی نێودەوڵەتی، پێویستییەكی بەپەلەی هەنووكەیی و لەپێشینەیە.
نێچیرڤان بارزانى داوا دەکات، میكانیزمی ئەو هەماهەنگییە لەنێوان لایەنە پەیوەندارەكانی
هەرێمی كوردستان و حكوومەتی فیدرالی عیراقدا بە هاوبەشی و پشتیوانیی هێزەكانی هاوپەیمانیی
نێودەوڵەتی كاراتر و فراونتر بكرێت و "پێكەوە بە هەموو هێز و توانایەكەوە بەرەنگاری
تیرۆرستانی داعش و هەڕەشە و مەترسییەكانی ببینەوە".