حكومهت دوو ملیار و 200 ملیۆن دیناری بۆ سلێمانی تهرخانكرد
05:35 - 24/11/2021
.jpg)
زهمهن_سلێمانی
حكومەتی هەرێمی كورددستان، بڕیاریدا بڕی دوو ملیار و 200 ملیۆن دینار بۆ هەواری
شار لە سلێمانی خەرج دەكات.
بەپێی ڕاگەیەندراوێك كە لەلایەن فەرمانگەی میدیا و زانیاریی حكومەتی هەرێمەوە
بڵاوكرایەوە”لەسەر راسپاردەی مەسرور بارزانی، سەرۆكی ئەنجومەنی وەزیران رەزامەندیی
درا لەسەر خەرجكردنی گوژمەی 2 ملیار و 200 ملیۆن دینار بۆ وەزارەتی شارەوانی و گەشتوگوزار/
سەرۆكایەتی شارەوانی سلێمانی، بە مەبەستی جێبەجێكردنی پڕۆژەی بەڕێوەبردن و چاكسازی
پاركی هەواری شار لە پارێزگای سلێمانی، ئەو بڕە پارەیەش قۆناغ بە قۆناغ و بە شێوەی
نەختینە خەرج دەكرێت”.
هەر لە ڕاگەیەدراوەكەدا هاتووە”دوای ئامادەكردن و گرتنەبەری گشت ڕێكارەكانی
پرۆسەی تەندەرین، پڕۆژەكە چووەتە بواری جێبەجێكردن و لەلایەن كۆمپانیای (لانتانا)ش
جێبەجێ دەكرێت”.
پێشتر حكومەتی ھەرێمی كوردستان ڕەزامەندی لەسەر تەرخانكردن و خەرجكردنی
گوژمەی 4 ملیار و 527 ملیۆن و 454 هەزار و 500 دینار دەربڕی بوو، لەسەر بودجەی وەگەڕخستن
بەشێوەی نەختینە و قۆناغ بە قوناغ بەمەبەستی جێبەجێكردن و بەڕێوەبردن و چاكسازی لە
چەند پرۆژەیەكی پارێزگای سلێمانی و پارەكەش لەسەر بودجەی سەرۆكایەتی شارەوانی سلێمانی
خەرج دەكرێت كە پڕۆژەكان بریتی بوون لە: بەڕێوەبردن و چاكسازی پاركی هەواری شار، بەڕێوەبردن
و چاكسازی بلواری شەست مەتری مەلیك مەحمود، بەڕێوەبردن و چاكسازی بلواری سلێمانی –
تاسڵوجە.