570 جیهان

بەریتانیا كێشەی منداڵبوونی هەیە

07:39 - 20/09/2021

زەمەن_جیهانی

دەزگایەکی بەریتانی، هۆشداری لەوەداوە کە شانشینی یەکگرتوو لەبەردەم مەترسی قەیرانی منداڵبووندایە و ئەمەش دەبێتە هۆی پەکخستنی ئابووری بۆ ماوەیەکی درێژ.

بەگوێرەی لێکۆڵینەوەیەکی وەقفی بازاڕی کۆمەڵایەتی کە دەزگایەکی بەریتانییە لە ساڵی ١٩٦٤دا، رێژەی منداڵبوون لەو وڵاتە گەیشتووەتە لووتکە و تێکڕا هەر ژنێک ٢،٩٣ منداڵی بەرکەوتووە.

بەڵام ساڵی رابردوو، ئەم رێژەیە بۆ ١،٥٨ کەمی کردووە و ئەم رێژەیەش کەمترە لە رێژەی پێویست بۆ بەردەوامیدان بە جێگیری ژمارەی دانیشتوان کە لەسەدا ٢،١ە.

لە لێکۆڵینەوەکەدا باس لەوە کراوە کە دابەزینی رێژەی منداڵبوون لە داهاتوودا گرفتی نەبوونی هێزی کار دروست دەکات و هاتووە "لەئێستادا لە کۆی هەر ١٠ کەسێک کە کار دەکەن سیانیان تەمەنیان لە سەروو ٦٥ ساڵەوەیە، بەڵام لە ١٠ ساڵی داهاتوودا ئەم رێژەیە بۆ ٣،٥ کەس بەرزدەبێتەوە و لە ساڵی ٢٠٦٠دا دەگاتە چوار کەس".

ئاماژە بەوەش دراوە کە تا ساڵی ٢٠٥٠ لە هەر چوار بەریتانییەک یەکێکیان تەمەنی دەگاتە سەروو ٦٥ ساڵ، بەم هۆیەوە هێزی کار کەمدەبێتەوە و ئەو کەسانەی پێویستییان بە هاوکاری دەوڵەت و مووچەی خانەنشینی هەیە زیاد دەکەن.

لە راپۆرتەکەدا باس لەوە کراوە کە قەیرانی منداڵبوون ئابووری بەریتانیا بۆ ماوەیەکی درێژ تووشی پەککەوتن دەکات و ئاماژە بەوەش دراوە کە بەشێک لە وڵاتانی جیهان بۆ زیادبوونی رێژەی منداڵبوون بەشێوەیەکی راستەوخۆ پاڵپشتی دارایی دەدەن بە دایکان و باوکان.