514 جیهان

خێزانێكی ئه‌فغانی داوای لێبوردنی ئه‌مریكایان قبوڵ نه‌كرد

12:07 - 19/09/2021

زه‌مه‌ن_جیهانی

کەسوکاری ئەو دە کەسە مەدەنییەى کە حەوتیان منداڵ بوون و لە ئەنجامی ھێرشێکی ئاسمانیی ئەمریکا لە ناوچەیەکی نزیک فڕۆکەخانەی کابوڵ کوژران، رایانگەیاند کە سەرەخۆشی و داوای لێبوردنی ئەمریکایان قبوڵ نەکردووە و داوایان کرد کە دەیانەوێت بۆ وڵاتێکی ئارام کۆچ بکەن.

دوای ئەوەی فەرماندەی ھێزەکانی ناوەندیی ئەمریکا (CENTCOM)، جەنەڕاڵ فرانک ماکینز، رایگەیاند، تەواوی ئەو دە کەسەی کە کوژراون کەسانی مەدەنین و ئەندامی یەک خێزانن و داوای لێبوردنی کرد.

کەسوکاری قوربانییەکان ھێرشە ئاسمانییەکەی ئەمریکایان بە تاوانی جەنگ ناوبرد و داوایان لە کۆمەڵگەی نێودەوڵەتی کرد کە واز لەو رووداوە نەھێنن و لە بەردەم دادگایەکی سەربەخۆیی نێودەوڵەتيدا لێپرسینەوە لە بەرپرسانی رووداوەکە بکرێت.

ھێشتا داروپەردووی ئەو خانووەی کە ھێرشە ئاسمانییەکەی کراوەتە سەر و دەکەوێتە گەڕەکی ھۆجا بوغرا لە دووری سێ کیلۆمەترەوە لە فرۆکەخانەی نێودەوڵەتیی حامید کارزایی لە کابوڵ، ھەڵنەگیراوە.
رۆمەل ئەحمەدی برای ئەندازیار و کارمەندی رێکخراوە ھاوکارییەکان زاماری ئەحمەدیی تەمەن ٤٣ ساڵان كە دەنگۆى داعشبوونى لێدەكرا و لە هێرشە ئاسمانييەكەدا كوژرا، ، ئەوەی راگەیاند کە سێ منداڵی لە ھێرشەکە گیانیان لەدەستداوە و ئەو کەسانەی دیکەش کە گیانیان لەدەستداوە برازا و خزمى دەبن و گوتی: "داوای لێبوردن کردنی ئەمریکا لە دوورەوە قبوڵ ناکەین. با لە نزیکەوە ببینن کە ئێمە تاوانبار نین. با پەیوەندیمان پێوە بکەن و قەرەبووی زیانەکانمان بکەنەوە. ئەمریکا پارەی خوێنمان بداتێ. ئێمە لە سەرەتاوە بێتاوانین".

ئەحمەدی، ئەوەشی راگەیاند کە بەھۆی ئەوەی ئەمریکا ئەوانی بە ئەندامبوون لە داعش تاوانبار کردووە، کراونەتە ئامانج و ھەرەشەیان لێدەکرێت و گوتی: "با ئەمریکا ئێمەش لێرەوە ببات".

محەمەد نەسیم لەلای خۆیەوە خاڵی زاماری ئەحمەدی، داوای لە کۆمەڵگەی نێودەوڵەتی کرد کە واز لە بەرپرسیاران نەھێنن و لێپرسینەوەیان لێبکەن و گوتی: "ئەمە تاوانێکی جەنگە، لێبوردنی تێدا نییە".
محەمەد نەسیم، جەختی لەوەش کردەوە کە پێشتریش گوتویانە کە ئەوان کەسی مەدەنین و پەیوەندییان بە ھیچ گرووپێکەوە نییە و گوتی: "قبوڵیان نەکرد. لە کۆتاییدا ئێوارەی رۆژی رابردوو لە رێگەی میدیاوە زانیمان، دۆستەکانمان پەیوەندییان پێوە کردین. ئەمریکا تاوانەکەی خۆی قبوڵ کردووە. ئیتر بە داواکردنی لێبوردن ئێمە ھیچ شتێکمان بەدەست ناکەوێت".

رۆژی رابردوو فەرماندەی ھێزەکانی ناوەندیی ئەمریکا (CENTCOM)، فرانک ماکینز، رایگەیاند، تەواوی ئەو دە کەسەی کە لە ئەنجامی ئۆپەراسیۆنە ئاسمانیەکەی ٢٩ی ئابی ئەمریکا بۆسەر ناوچەیەکی نزیک لە فڕۆکەخانەی کابوڵ لە ئەفغانستان، کوژراون کەسانی سڤیلن و بەھۆی ئۆپەراسیۆنەکەوە داوای لێبوردنی کرد.