زانیارى نوێ لەبارەى شێرەکەى بازیان
02:50 - 20/10/2020
3204 جار خوێندراوەتەوە
"زەمەن"
لە چەند رۆژى رابردوو، لە سنورى ناحیەى بازیان له نزیك سلێمانی، شێرێک لەلایەن
دانیشتوانى گوندێکەوە بینراوە و ئەمڕۆش شوێن پێى شێرەکە دۆزراوەتەوە و دڵەڕاوکێى
زۆرى دروستکردووە.
ئیسماعیل ئەحمەد بەڕێوەبەرى ناحیەى بازیان بە "زەمەن"ى راگەیاند،
لەچەند رۆژى رابردوو ئاگادار کراونەتەوە لە بونى شێرێک لە گوندێکى سنورەکە کە دڵەڕاوکێى
لاى هاوڵاتیانى ئەو گوندە دروستکردووە و بەشێکیشیان ماڵیان چۆڵکردوە، بۆیە لەگەڵ هێزەکانى
پۆلیس هەڵمەتێکیان کردووە بۆ دۆزینەوەى، بەڵام هیچیان نەبینیوە و دوێنێش بە فڕۆکەى وەزارەتى ناوخۆ بەدوایدا گەڕاون.
وتیشى، ئەمڕۆ شێرەکە لەلایەن چەند کەسێکى ترەوە لە سنورى تەیناڵ بینراوە و
گوێیان لە دەنگى بووە دڵەڕاوکێ و ترسێکى زۆرى لاى خەڵکى ناوچەکە دروستکردووە، بۆیە
ئەمڕۆ بە چوار فڕۆکە بەدوایدا گەڕاون.
ئیسماعیل ئەحمەد ئاشکراشیکرد کە شوێن پێى شێرەکە و شوێنى خەوتنەکەى دۆزراونەتەوە
و بە راپۆرت ئاڕاستەى دادگا کراوە و تیمى شارەزا شوێنپێکانیان هەڵگرتوەتەوە و
ئێستا گومانەکان زیاتر بوون.
بەڕێوەبەرى ناحیەى بازیان ئاماژەى بەوەشکرد، بەوتەى ئەو کەسانەى شێرەکەیان
بینیوە، زۆر گەورە بووە و پێشبینى دەکرێت لەو شوێنێکى دەرەوەى بازیانەوە هەڵاتبێت،
هەر ئەوەش ترسى زۆرى لاى هاوڵاتیانى سنورەکە دروستکردووە.