کوردستان

چین؛ ئەو وڵاتەی کۆرۆنای تێدا بڵاوبووەوە ئێستا لە چ دۆخێکدایە؟

12:35 - 14/10/2020 507 جار خوێندراوەتەوە

زەمەن - دیسکی شیکاری

بۆ یەکەمجار، ڤایرۆسی کۆرۆنا لە وڵاتی چین بڵاوبووەوە و لە ئێستادا زیاتر لە ٣٨ ملیۆن کەس لە ١٨٩ وڵاتی جیهان تووشی ڤایرۆسەکە بوون و لەو ژمارەیەش زیاترلە یەک ملیۆن کەس بە کۆرۆنا گیانیان لەدەستداوە، دوای بەردەوامی بڵاوبوونەوەی کۆرۆنا لە جیهان، وڵاتی چین و یەکەم شوێنی بڵاوبوونەوەی کۆرۆنا لە چ دۆخێکدایە؟


لە کۆتایی مانگی ١٢ی ساڵی رابردوو و بە دیاریکراوی رۆژی ٣١ دیسەمبەری ٢٠١٩، کۆمسیۆنی تەندروستیی وهان، بڵاوبوونەوەی ڤایرۆسی کۆرۆنای لە پاریزگای هوبی وهان راگەیاند و رۆژی ١ی ١ی ٢٠٢٠، رێکخراوی تەندروستیی جیهانی، تیمێکی پشتگیری ڕەوانەی وهان کرد.

لە سەرەتایی ٢٠٢٠دا، ڤایرۆسی کۆرۆنا بە شێوەیەکی خێرا لە وهانی چین بڵاوبوویەوە و بەپێی ئامارەکان، تاوەکو ئێستا ٨٥ هەزار و ٦١١ حاڵەتی توشبوون لەو وڵاتە تۆمارکراون.

چین؛ ئەو وڵاتەی کۆرۆنای تێدا بڵاوبووەوە ئێستا لە چ دۆخێکدایە؟

بەپێی ماڵپەڕی worldometers تایبەت بە دواین ئامارەکانی بڵاوبوونەوەی ڤایرۆسی کۆرۆنا، چین، یەکەم شوێنی بڵاوبوونەوەی ڤایرۆسەکە، لە ماوەی ٢٤ کاتژمێری رابردوودا تەنیا ٢٠ حاڵەتی نوێی توشبوون تۆمارکراوە و هیچ حاڵەتێکی گیانلەدەستدانیش تۆمارنەکراوە، هاوکات، ریزبەندی یەکەمی بۆ ئەمریکا جێهێشتووە و ئێستا لە ریزبەندی توشبوواندا ٥٠هەمین وڵاتە.

تۆمارکردنی ٢٠ حاڵەتی نوێ لە کاتێکدایە، ژمارەی دانیشتوانی وڵاتی چین نزیکەی یەک ملیار و ٤٤٠ ملیۆن و ٩٣٧ هەزار کەسە، بەراورد بە ژمارەی دانیشتوانی ئەو وڵاتە ڤایرۆسەکە کۆنتڕۆڵکراوە و لە شاری وهان و شوێنی بڵاوبوونەوەی ڤایرۆسەکەش ژیان ئاساییبووەتەوە.

کەمبوونەوە و کۆنتڕۆڵکردنی کۆرۆنا لە وڵاتی چین و یەکەم لانکی بڵاوبووەی کۆرۆنا بە جۆرێکە، لە ماوەی پێنج مانگی رابردوودا نزیکەی سێ هەزار حەڵەتی نوێ لە سەرتاسەری ئەو وڵاتە تۆمارکراوە و بەوەش بە رێژەی ٩٩٪ ژمارەی توشبووان کەمبووەتەوە.

ئێستا چ وڵاتێک لە تۆمارکردنی ژمارەی توشبووان یەکەمی ریزبەندییەکەیە؟

بەپێی ریزبەندییەکان، وڵاتی ئەمریکا و زلهێزی جیهان، بە تۆمارکردنی زیاتر لە ٨ ملیۆن توشبووی کۆرۆنا، لە ریزبەندی توشبوواندا یەکەم وڵاتە و تەنانەت، دۆناڵد ترەمپ، سەرۆکی ئەمریکاش سەرەتای ئەم مانگە تووشی ڤایرۆسکە بووم دوای ئەمریکا، هەریەک لە هندستان و بەرازیل و روسیا لە پلەکانی دووەم و سێیەم و چوارمدان لە رووی زۆری ژمارەی توشبووانی کۆرۆناوە.

ئەو وڵاتانەی رۆژ بە رۆژ ژمارەی توشبووان لە هەڵکشاندایە:

بەپیی راپۆرتێکی بی بی سی بەریتانی، هەریەک لە وڵاتانی ئەرجەنتین، ئیندۆنیزیا، ئۆکرانیا و عێراق لەو وڵاتانەن کە رۆژ بە رۆژ ئاماری توشبووان لە بەرزبوونەوەدایە.

نویترین هەواڵی ڤاکسین چییە؟

دوای نزیکەی ١٠ مانگ لە بڵاوبوونەوەی ڤایرۆسی کۆرۆنا و توشبوونی زیاتر لە ٣٨ ملیۆن کەس و سەرکردەی وڵاتان و گیانلەدەستدانی زیاتر لە یەک ملیۆن لە سەرانسەری جیهاندا، سەرەڕای هەوڵە بەردەوامەکانی سەدان کۆمپانیا و وڵات بۆ بەرهەمهینانی ڤاکسینی کۆرۆنا، بەڵام تاوەکو ئێستا هەوڵەکان بە ئەنجام نەگەیشتوون و کاتێکی دیاریکراو بۆ بەردەستبوونی ڤاکسین دیاری نەکراوە.

کۆرۆنا لە هەرێمی کوردستان:

بەپێی دواین راگەیەنراوی وەزارەتی تەندروستیی هەرێم، لە ماوەی ٢٤ کاتژمێری رابردوودا ٩٠٠ حاڵەتی نوێی توشبوون بە کۆرۆنا تۆمارکراوە و تاوەکو ئێستا زیاتر لە ٥٧ هەزار حاڵەتی توشبوون و ٣٥ هەزار چاکبوونەوە و دوو هەزار و ٤٠ کەسیش بە ڤایرۆسەکە گیانیان لەدەستداوە.

هاوکات، دوای بەرزبوونەوەی زیاتری ژمارەی توشبووانی کۆرۆنا لە هەرێم، بڕیارە ئەمڕۆ، لیژنەی باڵای روبەڕوبوونەوەی کۆرۆنا،  کۆببێتەوە و بڕیار و رێنمای نوێ بۆ رێگریی لە بڵاوبوونەوەی زیاتری ڤایرۆسەکە بگرێتەبەر.

سۆشیال میدیا

ڕۆژنامەی زەمەن

Advertisement