هەواڵ

کاندیدی پاریزگاری کەرکوک، نوێترین شیعری لە کولتووری زەمەن بڵاودەکاتەوە

12:26 - 28/11/2019 299 جار خوێندراوەتەوە


تەیب جەبار، کاندیدی کورد بۆ پارێزگاری کەرکوک، نوێترین شیعری بەناوی (نەرمەبای دڵەڕاوكێ) لە ژمارە "٢٣"ی کولتووری زەمەن بڵاوکردەوە.

شیعرەکەی تەیب جەبار، پاش دوو رۆژ لە بڵاوکردنەوەی لە رۆژنامەکەدا، لە تۆڕە کۆمەڵایەتییەکان پێشوازییەکی زۆرکراو و دەیان خوێنەر و هەواداری شیعر، وێنەی شیعرەکەیان لە فەیسبووک و ستۆرییەکەیان بڵاوکردەوە.

تەیب جەبار، ئەندازیارێکی بە ئەزموونی شاری کەرکوکە، ساڵانێکە لە سلێمانی نیشتەجێیە. بەدەر لە پیشەی ئەندازیاریی، لە بواری رەخنەی ئەدەبی و شیعرنووسیندا، یەکێکە لە دەنگە جیاوازەکانی ئەدەبیاتی کوردیی. لە چەند مانگی رابردوودا، لەلایەن یەکێتی و پارتی بە هاوبەشی  کاندیدکرا بۆ پارێزگاری کەرکوک، لە ئێستاشدا چاوەڕوانی، رێکارە یاساییەکانە بۆ دەستبەکاربوونی وەک پارێزگاری کەرکوک. 

(نەرمەبای دڵەڕاوكێ)
تەیب جەبار

تكایە ئاگاداربە
نەوەك بەم سەرمایە
ئەو گۆرانییە بكەوێتە ئاوەكەوە
دوایی گەرووی دەنوسێ.
   ***
تكایە ئاگاداربە
نەوەك بەم گەرمایە
ئەو سرودە گڕ بگرێ
دوایی بۆمان ناكوژێتەوە. 
   ***
تكایە ئاگاداربە
نەوەك بەم قەرەباڵغیە
ئەو شیعرە سەیارە لێی بدا
دوایی كێش و سەروای دەشكێ.
   ***
تكایە ئاگاداربە
نەوەك بەم تاریكەشەوە
ئەو دەمەقاڵێیە ئاودیو بكەن
دوایی دەست بەتاڵ دادەنیشین.
   ***
تكایە ئاگاداربە
نەوەك بەم رۆژی رووناكە
رەنگی ئەو تابلۆیە بدزن
دوایی شەوكوێر دەبین.
   ***
تكایە ئاگاداربە
نەوەك لەم چۆڵەوانییە
ئەو قسەی نەستەقە بە تەنیا جێبهێڵن
دوایی پیاوخراپێ دەیڕفێنێ.
***
تكایە ئاگاداربە 
نەوەك لەم دۆخە نالەبارە
ئەو جوغرافیایە خۆی بشارێتەوە 
دوایی هەموو شتێكمان لە دەست دەچێ 
***
تكایە ئاگاداربە 
نەوەك لەم وەزعی قاتوقڕیە 
ئەو مێژووە سەری خۆی هەڵگرێ
دوایی تووشی پەتای لەبیرچوون دەبین

سۆشیال میدیا

ڕۆژنامەی زەمەن