وتار

ڕۆژی یادكردنەوەی تاوانێكی گەورە، ڕۆژی یادكردنەوەی سەردەشت عوسمان

5/5/2020 4:17:00 PM 180 جار خوێندراوەتەوە
مەریوان وریا قانع

ھەموو یادكردنەوەیەك بەشێكە لە كردەی دروستكردنی شوناسێك، شوناسێك كەرەستەكانی لەو ڕووداوەوە وەردەگرێت، كە یادیدەكەینەوە و لەسەری ڕادەوەستین.

یادكردنەوەی سەردەشت عوسمان ھەنگاوێكی بنەڕەتییە لە كردەی دروستكردنی شوناسێكی بەرپرس، شوناسێك نایەوێت بێدەنگ و بێلایەن بێت بەرامبەر بەو تاوان و بەدكارییانەی لە بەردەیدا ڕوودەدەن. شوناسێك دەیەوێت بەشداربێت لە كردەی پاكژكردنەوەی جیھاندا.

لەگەڵ كوشتنی ئەم گەنجە بەرپرس و ئازایەدا، پێوەرێكی ئەخلاقیی نوێ دروستدەبێت ناچارمان دەكات شێوازی مرۆڤبوون و ئیتیما بۆ جیھان و ڕادەی بەرپرسیارێتی خۆمانی پێبپێوین. پێوەرێك لەیەككاتدا دەمانكاتە مرۆڤێكی بەدەربەست و بوێر و بەرپرسیار. ھەموو ئەمانە وادەكات ناتوانین مردنی ئەم گەنجە لەیادیبكەین و بە بەردەوامی قورساییە ئینسانیی و ئەخلاقییەكەی لەبەرچاو نەگرین.

لە كۆمەڵگای ئێمەدا ھەموو شوناسێكی بەرپرس و ھەموو ڕێزگرتنێك لە مرۆڤبوونی مرۆڤ، بە ناچاری بەناو وێستگەی مردنی سەردەشت عوسماندا تێدەپەڕێت.

سەردەشت كۆڵەكەیەكی زۆر سەرەكیی شوناسی ھەموو ئەو كەسانەیە كە بەرپرسانە دەژین و بۆ درێژەدانیش بە ژیان كۆمەڵێك مەرجی ئینسانیی گەورەیان ھەیە.

شوناسێك نەیەوێت لەت لەت و دەمامكدار و شیزۆفرینی بێت، دەبێت بچێتە پەیوەندییەكی ئەخلاقییەوە لەگەڵ شوناسی ئەم مرۆڤە و مردنەكەیدا. ھەموومان قەرزاریی ئەم كۆڵەكە گەورەیە و ئەم پێوەرە ئەخلاقییە تازەیەین.




سۆشیال میدیا

ڕۆژنامەی زەمەن

Advertisement