پرۆسەی هەڵبژاردنی سەرۆكی جڤاتی گشتی گۆڕان و جێگرەكەی و سكرتێر دەسیپێكرد
10:15 - 12/09/2019
"زەمەن"
کۆبونەوەی جڤاتی گشتی بزوتنەوەی گۆڕان دەستیپێکردوە، و مەبەستی کۆبونەوەکەش دەنگدانە لەسەر کاندیدانی سەرۆکی جڤاتی گشتی ،
جێگرەکەی و سکرتێری جڤاتەکە.
پێشڕەو ڕەئوف ئەندامی جڤاتی گشتی بزوتنەوەی
گۆڕان بە دیجیتاڵ میدیای"زەمەن"ی ڕاگەیاند، ئەمڕۆ جڤاتی گشتی بزوتنەوەی
گۆڕان کۆدەبێتەوە و وتیشی، چەند کاندیدێک کە پێشتر بۆ ئەو سێ پۆستە خۆیان کاندید
کردبوو کشانەوە.
هەریەکە لە، "جەمال محەمەد و کوردە چاو
شین کاندیدن بۆ وەرگرتنی پۆستی سەرۆکی جڤاتی گشتی، هەروەها عەلی باڵا بەرز بۆ
وەرگرتنی پۆستی جێگری سەرۆکی جڤات و پێشڕەو ڕەئوف کاندیدی پۆستی سکرتێری جڤاتی
گشتین" پێشڕەو ڕەئوف وای وت.
وتیشی ، ئەو کاندیدەی دەبێتە سەرۆکی جڤاتی
گشتی ڕاستەوخۆ دەبێتەوە بە ئەندامی جڤاتی نیشتیمانی و خانەی ڕاپەڕاندنی بزوتنەوەی
گۆڕان.
لەئێستادا پڕۆسەی دەنگدان لەسەر کاندیدانی بزوتنەوەکە بۆ پۆستی، سەرۆک ، جێگر و سکرتێری جڤاتی گشتی بزوتنەوەی گۆڕان دەستیپێکردوە.
بڕیاریشە، ڕۆژی شەممەی داهاتوو ١٤/٩/٢٠١٩
جڤاتی نیشتیمانی بزوتنەوەی گۆڕان بەمەبەستی هەڵبژاردنی ڕێکخەری گشتی بزوتنەوەکە و
سکرتێری جڤاتی نیشتیمانی و ئەندامانی خانەی ڕاپەڕاندن کۆببێتەوە.