یەکێتیی زانایان: نوێژی هەینی فەرزەو جەژن سوننەتە
11:47 - 19/03/2026
زەمەن - هەواڵ
دوودڵییەک لەنێوان
هاووڵاتییاندا بڵاوبووەتەوە، کە گوایە پێویست ناکات لە یەکەم رۆژی جەژن دا بەشداری
لە هەردوو نوێژی بەکۆمەڵی جەژن و هەینی بکرێت، بەڵام نوێژی جەژن نابێتە جێگرەوەی
نوێژی هەینی.
د. عەبدوڵڵا شێرکاوەیی،
وتەبێژی یەکێتیی زانایانی ئایینی ئیسلامیی کوردستان، رایگەیاند: "ئەم جەژنە
وا هەڵکەوتووە کە جەژن و هەینی بکەونە هەمان رۆژ، بەو هۆیەوە دوو نوێژی بەکۆمەڵ دەکرێن
و دوو وتاریش لە مزگەوتەکان دەدرێن. ئەمەش دوودڵی و دەنگۆیەکی لەناو هاووڵاتییاندا
بڵاوکردووەتەوە، کە گوایە پێویست ناکات لە یەکەم رۆژی جەژن دا بەشداری لە هەردوو
نوێژ بکەن و نوێژی جەژن بەسە."
لەوبارەیەوە، د.
عەبدوڵڵا شێرکاوەیی وتی: "نوێژی جەژن و نوێژی هەینی شوێنگرەوەی یەکدی نین؛ نوێژی
هەینی فەرزە و نوێژی جەژنیش سوننەتە؛ هەربۆیە ناکرێت لەبری فەرز، سوننەت بکرێت."
وتەبێژی یەکێتیی
زانایانی ئایینی ئیسلامیی کوردستان باسی لەوەکرد: "هەر کەسێک بچێت بۆ نوێژی جەژن
و نەچێتە نوێژی هەینی، گوناهبار دەبێت؛ نوێژی هەینی فەرزە."
د. عەبدوڵڵا شێرکاوەیی
داوای لە موسڵمانان کرد، کە بەشداریی هەردوو نوێژی جەژن و هەینی بکەن.