د.نەرمین مەعروف زانیاری نوێ لەسەر مووچە دەخاتە روو
03:21 - 05/05/2025
زەمەن _ عیراقی
ئەندامێکی لیژنەی دارایی پەرلەمانی عێراق ئاشکرایکرد، دواکەوتنی مووچەی مووچەخۆرانی هەرێم بەهۆی نەبوونی پارەی کاشەوەیە.
ئەمڕۆ دووشەممە، ٥ی ئایاری ٢٠٢٥، د.نەرمین مەعروف، ئەندامی لیژنەی دارایی لە ئەنجومەنی نوێنەرانی عیراق ڕایگەیاند: دواکەوتنی مووچەی موچەخۆرانی هەرێم پەیوەندی بە قەیرانی داراییەوە نییە و هیچ قەیرانێکی دارایی لە عیراقدا نییە.
ئاماژەی بەوەشدا، دابەشکردنی موچە لە بەشێکی دامودەزگاکانی عیراقیشدا دواکەوتووە و گرفتەکەش تەنها نەبوونی پارەی نەختینەیە لەبەردەستی حکومەتی عیراقدا.
د. نەرمین مەعروف وتیشی: هیچ گرفتێک لە لیستی مووچەی موچەخۆرانی هەرێمدا نییە، حکومەتی عیراقیش هیچ نییەتێکی لەوجۆرەی نییە کە بیەوێت ئاستەنگ بۆ مووچە دروست بکات بەڵکو هەنگاوی ناوە بۆ ئەوەی چی زووترە پارەی کاش دابین بکات و موچەی پێ دابەش بکات.
ئەو ئەندامەی ئەنجومەنی نوێنەرانی عیراق ئاماژەی بەوەشکرد، ئەگەر دۆخێکی گەورەی جیهانی هەبێت کە کاریگەریی گەورە لەسەر داهات و ئابووری وڵات دروست بکات ئەوەیان جیاوازە، نەک تەنها حکومەتی عیراق بەڵکو بۆ حکومەتە گەورەکانیش گرفت دروست دەبێت، کە لە ئێستادا هیچ بابەتێکی لەو جۆرە بوونی نییە.