کوردستان

دوو كۆمه‌ڵه‌كه‌ يەکیان گرتەوە

06:07 - 20/11/2022 296 جار خوێندراوەتەوە

زەمەن_هەرێمى کوردستان


لە کۆبوونەوەیەکدا لە ستۆکهۆڵم، یەکگرتنەوەی هەردوو حزبی کۆمەڵەی شۆرشگێر و کۆمەڵەی زەحمەتکێشان بە فەرمی ڕاگەیەنرا.   


ئەمڕۆ یەکشەممە 20-11-2022، عەبدوڵا موهتەدی، سکرتێری کۆمەڵەی شۆڕشگێری زەحمەتکێشانی کوردستانی ئێران لە كۆبوونەوەیەكدا لە ستۆكهۆڵم، یەكگرتنەوەی كۆمەڵەی شۆرشگێر و كۆمەڵەی زەحمەتكێشانی بە فەرمی ڕاگەیاند.  

مەجید مارابی رۆژنامەوان و چاودێری سیاسی سەبارەت بەو یەکگرتنەوەیە بە «زەمەن»ی راگەیاند: لەم قۆناغەی ئێستای شۆڕشی ژینادا کە خەڵکی کورد لە رۆژهەڵات لە شەڕی دەستەویەخەدان لەگەڵ رژێم، یەکێتی و یەکڕیزی  و هاودەنگی و تەبایی لایەنە سیاسیەکان یەکێک لە ئەرکە هەنووکەیەکانی ئەم شۆڕشەیە.

وتی: بە خۆشحاڵییەکی زۆرەوە ئەمڕۆ دولایەنی کۆمەڵە(کۆمەڵەی شۆڕشگێڕی زەحمەتکێشانی کوردستان و کۆمەڵەی زەحمەتکێشان) یەکگرتنەوەی خۆیان راگەیاند، ئەمە هەنگاوێکی زۆر زۆر گرنگ و پێویست بوو و هێز و ورەی زیاتر بە شۆڕش دەبەخشێت، هیوادارم بە زوویی کۆمەڵەی کۆمۆنیستیش دەرک بە گرنگی ئەم بابەتە بکات و یەکگرتنەوەی  گەوەرەی ناو ماڵی کۆمەڵە کامڵ بکات.

یه‌كگرتنه‌وه‌ى دوو كۆمه‌ڵه‌ى ڕۆژهه‌ڵاتى كوردستان له‌كاتێكدایه‌، هه‌ردوو حزبى دیموكرات دواى 15 ساڵ دابڕان‌و به‌جیا كاركردن ڕۆژى 16ى 8ى ئه‌مساڵ بڕیاریاندا یه‌كبگرنه‌وه‌.

سۆشیال میدیا

ڕۆژنامەی زەمەن