کوردستان

رێبوار ئەحمەد
دانانى کامێرا بەمشێوازە لەگەڵ سیستمى ژیان و موچە و رێگاوبانەکان یەکناگرێتەوه‌

07:55 - 15/08/2022 154 جار خوێندراوەتەوە

"زەمەن"


سەرۆکى فراکسیۆنى گۆڕان رایدەگەیەنێت؛ داواى کۆبونەوەى ئەنجومەنى پارێزگایان کردوە بۆ هەڵوەشاندنەوەى بڕیارى دانانى کامێراى هاتوچۆ بەو شێوازەى بڕیارى لێدراوە، چونکە زیانى بۆ کۆى گشتى شۆفێران و هاوڵاتییان هەیە.

رێبوار ئەحمەد سەرۆکى فراکسیۆنى گۆڕان لە ئەنجومەنى پارێزگاى سلێمانى رایدەگەیەنێت؛ وەک فراکسیۆنى گۆڕان و ئەنجومەنى پارێزگا بڕیارى دانانى کامێراى چاودێرى بەو شێوەیەى دراوەتە کۆمپانیایەک رەت دەکەینەوە و پێویستە هەڵبوەشێنرێتەوە، داواى کۆبونەوەى ئەنجومەنى پارێزگاشمان کردوە بۆ ئەو مەبەستە و راسپاردەکانى ئاڕاستەى وەزارەتى ناوخۆ و ئەنجومەنى وەزیران دەکەین.

سەرۆکى فراکسیۆنى گۆڕان لە ئەنجومەنى پارێزگاى سلێمانى، ئاماژە بەوە دەکات کە ئەرک و ئامانجى فراکسیۆنەکە و ئەنجومەنى پارێزگا لەبەرچاوگرتنى بەرژەوەندى گشتى پارێزگاى سلێمانییە و پێمانوایە بڕیارى دانانى کامێراى هاتوچۆ بەو شێوەیەى ئێستا چ لە روى سیستمى کارکردنى کامێراکان و چ لەو داهاتە زۆرەى دەدرێتە کۆمپانیا زیان بە هاوڵاتیان دەگەیەنێت، بۆیە داوا دەکەین وەزارەت ناوخۆ و ئەنجومەنى وەزیرانیش کە لە ستراتیژى کارى کابینەى نۆیەمدا ئاماژەى بۆ کراوە بەرژەوەندى گشتى لە بەرچاو بگرێت و پێویستە ئەم بابەتە چارەسەر بکرێت و ئەو بڕیارەى دراوە هەڵبوەشێنرێتەوە.

دەشڵێت: ئێمە دژى دانانى کامێراى هاتوچۆ نین، بەڵام پێویستە بە میکانیزمێک بێت خەڵک زیانى لێنەکرێت، ئێمە پێمانوایە ئەم بڕیارە بەبێ دیراسە و لێکۆڵینە دراوە و دانانى کامێرا بەم شێوازە لەگەڵ سیستمى ژیان و موچە و تەنانەت رێگاوبانەکانى هەرێمى کوردستان یەکناگرێتەوە، جگە لەوەش زۆرینەى داهاتەکەى لەبرى ئەوەى بۆ خزمەتى پارێزگاکە و رێگاوبان خەرج بکرێت دەدرێتە کۆمپانیا، بۆیە ئێمە داواى هەڵوەشاندنەوەى دەکەین.

سۆشیال میدیا

ڕۆژنامەی زەمەن