جیهان

کەشتییەکی ناسا له‌دوای بڕینی ٤٧٠ ملیۆن کیلۆمەتر لەسەر مەریخ نیشتەوە

10:11 - 19/02/2021 244 جار خوێندراوەتەوە

زه‌مه‌ن - جیهانی
ئاژانسی ناسا رایگەیاند کە کەشتییەکی ئاسمانی بە ناوی "Perseverance" بەسەرکەوتوویی لەسەر ھەسارەی مەریخ نیشتووەتەوە.


ئەو کەشتییە ئاسمانییەی ناسا کە کێشەکەی یەک تۆنە، لە دوای حەوت مانگ گەشتکردن لە کاتژمێر ١٥:٥٥ خولەک بەکاتی ئەمریکا لەسەر ھەسارەی مەریخ نیشتەوە.

پرۆسەی نیشتنەوەی ئەو کەشتییە ئاسمانییە کە لەلایەن ناساوە بە شێوەیەکی راستەوخۆ پەخش دەکرا، بەسەرکەوتوویی ئەنجامدرا و چرکە ساتی یەکەمی نیشتنەوەکە بە نزیکەی ١١ خولەک دواکەوتن نیشانی خەڵکی درا بەھۆی ئەو دوورییەی کە لە نێوان مەریخ و زەوی بوونی ھەیە.

کەشتی ئاسمانی "Perseverance" لە بەرواری ٣٠ی حوزەیرانی ٢٠٢٠ لە وێستگەی ھێزەکانی ئاسمانی Cape Canaveral لە فلۆریدا بۆ بۆشای ئاسمان نێردرا و لە دوای بڕینی دووری ٤٧٠ ملیۆن کیلۆمەتر توانی بەسەرکەوتوویی لەسەر ھەسارەی مەریخ لەو کاتەی کە پێشبینی کرابوو، بنیشێتەوە.

ئەوەش راگەیەندرا کە ٢٠ کامێرا و دوو مایکرۆفۆن لەسەر ئەو کەشتییە ئاسمانییە ھەیە و بەم ھۆیەوەش چاوەڕێ دەکرێ وێنەی زۆر تایبەت بۆ جیھان بنێرێ. لە پاڵ ئەمەش ھەوڵدەدرێ ھێلیکۆپتەرێکی بچووکی نێو کەشتییەکە بفرێندرێ کە توانای تۆمارکردنی وێنە و ڤیدیۆی ھەیە.

سۆشیال میدیا

ڕۆژنامەی زەمەن

Advertisement