نوێترین نۆڤڵێتی مەحمود نەجمەدین بڵاوکرایەوە
08:51 - 23/10/2020
98 جار خوێندراوەتەوە
کولتووری زەمەن
(پەنجاوهەشت"و "موفید بەگ) نوێترین بەرهەمی چیرۆکنووس مەحمود نەجمەدینە، کە ئەمڕۆ لە دوو توێی کتێبێکدا بەناوی پەنجا وهەشت بڵاوکرایەوە، ئەم کتێبە ئەو دوو نۆڤێڵتەی لە خۆگرتووە و بە ستایلێکی جوانی گێڕانەوەو تەکنیکی تایبەتیی نووسراوەتەوە.
پەنجاوهەشت، مانیفێستی ڕەش، سێڵاوی خوێن و شەهوەت. چیرۆکی برسی کردن و کۆیلەکردن و بەگژاچوونەوەی ستەمکاریی و یاخیبوون... چیرۆکی جەردەی پۆشتە و پەرداغ، کە چۆن پارە و دەسەڵات کردنی بە نەجیبزادە...
ئەم بەرهەمە لە دوو نۆڤلێت پێکدێ"پەنجاوهەشت"و "موفید بەگ " لە بڵاوکراوەکانی چاپەمەنی خانی یە. لە ناوەندی خانی دەست دەکەوێت و بڕیار وایە ڕۆژانی ئایندە لە شارەکانی دیکەی ڕۆژهەڵات و باشووری کوردستان بڵاوببێتەوە.
لەنۆڤلێتی" پەنجاوهەشت" ەوە:
...حەشیمەتی گیرفان بەتاڵیش پاناوپان هەر دوو سایدەكەیان گرتووە و داوای مووچەی پار و پێرار دەكەن، وەكوو بڵێی هی ئەم ساڵ لە جێبایە! ئەم وڵساتەش لە شین و شایی دەستكەوتی خۆی هەیە، حیزە و بەختەكەی وەكوو سەگ دەوڕی، ساڵیانی ساڵ لە بەختی ئەم گەزۆ دەبارێ، لە هەموو بارێكدا براوەیە، شین و شایی بەخێری وی دەشكێتەوە، لە رێپێوانەكەی دوێنێدا باڵا بەرزێكی لە چاو داوە...
لەنۆڤلێتی "موفید بەگ" ەوە:
جا كێ لە بەگ ناترسێ!؟ لامەزەبە، خوێنمژە. زەعیم سدیق لە چاویدا پەڕسێلكەی بێ زەواڵە. هێندە زاڵمە نادر شا و رەزا شا راست و چەپ وەكو دوو ڕەشمار لەسەر شانەكانی كپ و مات زیڕەیان كردووە. بارقی حاجی حنتە و ئیسماعیلی یەكەم و دووەم، ئەڵب ئەرسەلان، باوان و بنەوەوانی سوڵتان سلێمانیش هێندە زاڵم نین. لە مەلا تا ئەفەندی و فەیلەسوفی ریش سەكسوكی لەسەر قامكی دەخولێنەوە. قاچێكی لە تەلئەبیبە و ئەوی دیكەی لە شیرازە...