412وتار

وچانێکی کورت !

2/15/2022 2:33:00 PM
د.سیروان محەمەد


کاتی ئەوە نیە ئیتر فەیس بوک و هەڵچونی کاتی کەسێک لەسەر سێکتەرێکی دیاریکراو کاری حکومەتێک رانەگرێت و سوکایەتی بەو هەموو فەرمانبەرە بێدەرەتانە نەکات ! جارێک کارەبا و ڕۆژێک شارەوانی  یان  لیژنەکانی لابردنی زیادەڕەوی  و گلەییەک لە  تەندروستی!

ساڵێک زیاترە ئیدارەی گەرمیان هەنگاوی باشی ناوە بۆ کردنەوەی ئیدارەکە  بە ڕووی دنیا و هێنانی پرۆژەو هاتنی سەرۆکی حکومەت وسەرجەم وەزیرەکان و ئەو هەموو کونسل و وەفدە بۆ گەرمیان  و پێشکەشکردنی خزمەتگوزاری و بەهێزکردنی فەرمانگەکانی و بەشداری کارایان لە کۆبونەوەو چالاکییەکانی پایتەخت وبۆنەکان ، ڕۆژێک سەرکونسوڵی ئێران و دواتر کونسوڵی ئەڵمانیا و ژاپۆن .

 ئیدارەی گەرمیان دەوڵەمەنترین و بەهێزترین ئیدارەی  سەربەخۆی حکومەتی هەرێمی کوردستانە : مامەڵەی دەروازەیی نێودەوڵەتی تێدایە ، کۆمپانیای نەوتیی زلهێزەکانی دنیا کاری تێدا دەکەن، بەرەیەکی فراوانی جەنگی شکاندنی هێزی  داعشی پێشکەش بە مرۆڤایەتی کرد، ساڵانێکە ئاوارەی نێوخۆیی لەخۆگرتووە،کەمترین فەرمانبەری حکومی هەیە و زۆرترین ئەندامی هێزی شەڕکەری نیشتیمانی لە پێشمەرگەو ناوخۆ و هێزە سیاسییەکان تێدایە، زۆرترین ژمارەی پزیشکی پسپۆر و پسپۆری یاسایی و بروانامەی زانکۆیی بەرزی تێدایە

مۆزایکی ئیدارەی گەرمیان رەنگدانەوەی فرەڕەنگی سیاسی ناوچەکەیە کە سەڕەڕای ململانێی سەرەتا بۆ یەکتر قبوڵ نەکردن  ولەمپەر دروستکردن ئێستا پێگەشتوترەو ئارامی و لێک تێگەیشتن  و کاری پێکەوەیی و بریاردانی هاوبەش سیمای جوانی چەند ساڵی کاری رابوردووە  بۆ ئێستا.

گەرمیان ناوچەیەکی جوگرافی و ئابوری سیاسی گرنگە بۆ هەرێمی کوردستان ، هەر لە دەروازەی سنوری هێزی ئیقلیمی  بۆ نەوت و گازی سروشتی و ماوەی سەد ساڵە جێی کێشەو ململانێی سیاسی فرە نەتەوەیی  بووە بە دەرهاویشتە خراپەکانیشیەوە وەک پاکتاوکردنی نەتەوەیی شاڵاوی ئەنفال.

روانگە بۆ پێشخستن و فراوانکردن و بەهێزکردنی ئەم ئیدارەیە بە بیرکردنەوەی تەقلیدی ئیدارەدانی پانزدە ساڵ پێش ئێستا ناکرێت ! هەر وەک تێگەیشتن  و چاوکراوەیی گەرمیانیەکان پێش پانزدە ساڵ نییە بەڵام لێرەو لەوێ شەن و کەوی نازانستی و دوور لە  واقیعی مۆدێرن و سەردەمی 5G  و لۆکالیتی و بەکەم زانینی ماندوبون و بنیادنانی نیوخۆیی هەیە.

خێزانەکانی ئێرە قەرەباڵەغن و کۆمەڵایەتین و پرە لە  وزەیەکی بێشوماری گەنجی بێ کار و رەخنە گر و چالاک و زۆرترین چالاکوان و ڕۆژنامەنوسی بەتوانا و نوێنەری پەرلەمان و ئەنجومەنی کارای تێدایە
تا ئێرە وچانێک ...ئێستا کاتی ئەوەیە بخرێتە سەر ڕێگەی گەشەی شارە سەرکەوتووەکانی جیهان و پلانی ستراتیژی لەخۆبگرێت بە خستنە گەری سەرمایەی زیاتر و فەراهەمکردنی هەلی کار لە کەرتی تایبەت و وەبەرهێنان لە سەرجەم سێکتەرەکان بە تەندروستیشەوە بۆ بوژاندنەوەو باشترکردنی سەرجەم خزمەتگوزاریەکان لەورێگەیەوە ، هەروەها کەمکردنەوەی دژایەتی کردنی کۆمەڵایەتی بۆ ئەم بەرنامەیە و وەرچەرخان لە بیرکردنەوەی تەقلیدی و بچوک ، چونکە زامنی پێدانی کارە بۆ کەسە بەتوانا سەرکەوتووەکان و دروستکردنی داهێنان وململانێی پێشکەوتن ، ئەو دەمە هەموو سەرقاڵی کاری بەرهەمهێن دەبن و وازدەهێنرێت لە خۆدەرخستنی بێسود و کاتی قسەو پۆستی بەتاڵ و چەواشەکاری نامێنێت

سۆشیال میدیا

ڕۆژنامەی زەمەن